Tags-Khushi

mujhe jāntā bhī koī na thā mire be-niyāz tire sivā
na shikast-e-dil na shikast-e-jāñ ki tirī ḳhushī ko ḳhushī kahā

hai sarḳhushī kī tamannā bahut mire dil meñ
vo is liye ki ye dil ek dukh-bharā dil hai

ḳhushī se ranj kā badlā yahāñ nahīñ miltā
vo mil ga.e to mujhe āsmāñ nahīñ miltā

ḳhushī ḳhushī tirī duniyā ko chhoḌ aa.e ham
ḳhushī kā jab koī sāmān hī nahīñ paayā

apne pyāroñ se pyaar ham ko to thā
rañj paa.e magar ḳhushī bhī milī

ham soch rahe haiñ muddat se ab umr guzāreñ bhī to kahāñ
sahrā meñ ḳhushī ke phuul nahīñ shahroñ meñ ġhamoñ ke saa.e haiñ

vo jo hamrāz rahā hāzir-o-mustaqbil kā
us ke ḳhvāboñ kī ḳhushī ruuh kā ġham le ke chalo

nam diida huuñ, ki terī ḳhushī par huuñ ḳhush bahut
chal chhoḌ, tujh se kah jo diyā, ro nahīñ rahā

ḳhushī hai un ko ye jāntā huuñ magar maiñ rakhne ko baat apnī
kahūñ ye un se ki ba.ad-e-murdan tum aa ke mātam mirā na karnā

raste kī anjān ḳhushī hai
manzil kā an-jānā Dar hai

lamha lamha maut ko bhī zindagī samjhā huuñ maiñ
dūsroñ kī hī masarrat ko ḳhushī samjhā huuñ maiñ

bas ek insān kī ḳhushī hai kisī haqīqat kī rū-numā.ī
magar kisī ḳhvāb ke ziyāñ kā malāl ik shahr ke liye hai

haiñ qahqahe kisī ke kisī kī haiñ siskiyāñ
shāmil rahā ḳhushī meñ kisī bebasī kā shor

guzrā hai nāgavār unheñ be-kasī kā shor
kānoñ meñ jin ke guuñj rahā hai ḳhushī kā shor

ai dil ḳhushī kā zikr bhī karne na de mujhe
ġham kī bulandiyoñ se utarne na de mujhe

ġham ho ki ḳhushī donoñ kuchh duur ke sāthī haiñ
phir rasta hī rasta hai hañsnā hai na ronā hai

pahuñch saktā hai kab sachchī ḳhushī ko aish-e-nafsānī
ki vo to āb-e-ruknābād va jū-e-mūliyāñ tak hai

dil meñ koī ḳhushī nahīñ lekin
ādatan muskurā rahā huuñ maiñ

ġham hai na ab ḳhushī hai na ummīd hai na yaas
sab se najāt paa.e zamāne guzar ga.e

mirī ḳhushī kī unheñ kis liye ḳhushī hogī
mire malāl kā un ko malāl kyā hogā