Tags-Khushi

karam inaad ḳhushī ġham asīr-e-māyūsī
diloñ ko detī hai duniyā bhī dāvateñ kyā kyā

hamāre apne hī dukh the hamīñ ko ronā thā
tumhārī apnī ḳhushī thī thī tumhārī baat nahīñ

kaif-o-nashāt-o-sar-ḳhushī nemateñ sab usī kī haiñ
mujh ko atā kiyā huā dard bhī mere rab kā hai

sirf ik karb-e-musalsal hī nahīñ hai zindagī
muḳhtasar vaqfe kī sūrat hai ḳhushī bāteñ karo

kahīñ kho diyā kahīñ pā liyā kahīñ ro liyā kahīñ gā liyā
kahīñ chhīn letī hai har ḳhushī kahīñ mehrbāñ be-hisāb hai

kab raas aa.ī mujh ko mirī fat.h kī ḳhushī
maiñ dil-shikasta ho gayā us kī shikast par

ham se rūThī har ḳhushī hai aaj kal
kashmakash meñ zindagī hai aaj kal

pañkh-pakherū ḳhvāb se chauñke sab ne ḳhushī ke na.are maare
aa.ī sadā murġhān-e-sahar kī chauñk musāfir raat nahīñ hai

'rāhīl' ġham ke ba.ad ḳhushī bhī mile magar
is bahr-e-be-karāñ kā kinārā koī to ho

na koī ḳhushī na malāl hai ki sabhī kā ek sā haal hai
tire sukh ke din bhī guzar ga.e mirī ġham kī raat bhī kaT ga.ī

pā.eñge ḳhushī bhī ham ranj-o-ġham bhī jheleñge
is jahān meñ jab tak apnā āb-o-dāna hai

vo mohabbat jo ḳhushī kī ruuh thī
chashma-e-āzār ho kar rah ga.ī

apnī ḳhushī se mujhe terī ḳhushī thī aziiz
tū bhī magar jaane kyuuñ mujh se ḳhafā ho gayā

har ik ko jaan dene kī ḳhushī ho
ajal gar nāvak-e-qātil se badle

ḳhushī hogī davāmī ġham-zadoñ ko jab kabhī hogī
jise har-vaqt ho ārām use ārām kyā hogā

zamāne bhar ne kahā 'arsh' jo, ḳhushī se sahā
par ek lafz jo us ne kahā sahā na gayā

nahīñ nahīñ hameñ ab terī justujū bhī nahīñ
tujhe bhī bhuul ga.e ham tirī ḳhushī ke liye

us se milne kī ḳhushī ba.ad meñ dukh detī hai
jashn ke ba.ad kā sannāTā bahut khaltā hai

ḳhushī ye dil kī hai is meñ nahīñ hai aql ko daḳhl
burā vo kahte rahe aur kuchh burā na lagā

ḳhushī ham se kinārā kar rahī hai
hameñ ġham ko bhī apnānā paḌegā