Tags-Khushi

mujhe ġhamgīñ na chhoḌ rotā aaj
tujhe apnī hañsī-ḳhushī kī qasam

āñsuoñ meñ alam kā rañg na thā
qahqahoñ meñ ḳhushī kī baat na thī

kisī ko kho ke pā liyā kisī ko pā ke kho diyā
na intihā ḳhushī kī hai na intihā malāl kī

charāġh qatl huā to ḳhushī se maqtal meñ
lagā ke nāra-e-raqsam havā ne raqs kiyā

ḳhushī kī kasrat agar ho un ko to ban ke āñkhoñ meñ aa.eñ aañsū
ziyāda yaañ tak haiñ apnī had se na Thahre aariz meñ āb-e-āriz

'ḳhizāñ' kabhī to kaho ek is tarah kī ġhazal
ki jaise raah meñ bachche ḳhushī se khelte haiñ

ḳhushī se kaañp rahī thiiñ ye uñgliyāñ itnī
delete ho gayā ik shaḳhs save karne meñ

tabdīl-e-bahr se vo ġhazal paḌh ba-āb-o-tāb
'ehsāñ' ḳhushī ho jis se dil-e-sāma.īn ko

dushman bhī gar mare to ḳhushī kā nahīñ mahal
koī jahāñ se aaj gayā koī kal gayā

jo ḳhushī hai faanī to hai ġham bhī faanī
na ye jāvedānī na vo jāvedānī

hai ḳhushī kā saudā ḳhalish-e-nihānī
hai jigar kā chhālā samar-e-javānī

āġhosh meñ aa ki kāmrānī kar luuñ
kuchh roz ḳhushī se zindagānī kar luuñ

un kā ik patlā sā ḳhanjar un kā ik nāzuk sā haath
vo to ye kahiye mirī gardan ḳhushī meñ kaT ga.ī

vo ḳhushī huuñ jo dard sulgā.e
aag jis se lage vo paanī huuñ

ḳhushī kī milī ye sazā rafta rafta
ta.āruf ġhamoñ se huā rafta rafta

kitnā hotā hai mire dil ko ḳhushī kā ehsās
koī paudā jo sar raah lagā detā huuñ

nigāh-e-qahr-parvar ko bhī tamhīd-e-ḳhushī samjhe
samajhnā hai to koī ham se rāz-e-zindagī samjhe

nahīñ hai kuchh qatl un kā āsāñ ye saḳht-jāñ haiñ bure balā ke
qazā ko pahle sharīk karnā ye kaam apnī ḳhushī na karnā

halāk andāz-e-vasl karnā ki parda rah jaa.e kuchh hamārā
ġham-e-judā.ī meñ ḳhaak kar ke kahīñ adū kī ḳhushī na karnā

ḳhushī terī jise har-dam ho darkār
koī is se nahīñ hotā hai nā-ḳhush