Tags-Khushi

jinhoñ ne māñgī unheñ to dī hī ga.ī jahāñ meñ ḳhushī kī daulat
baġhair māñge bhī kāhiloñ par falak se ġham be-hisāb utre

saaf jazboñ ke havāle se to ġham haiñ lekin
ek lamhe kī ḳhushī ek sadī rahtī hai

kyā kyā dhare ajūbe haiñ shahr-e-ḳhayāl meñ
biite ḳhushī se din to kaTe shab malāl meñ

mere bhaa.ī agar darmiyāñ apne dīvār uThtī nahīñ
terā dukh bāñTtā aur tujh se maiñ apnī ḳhushī bāñTtā

mujhe ḳhushī ki giraftār maiñ huā terā
to shaad ho ki hai aisā shikār asiir mirā

kaise dil meñ ḳhushī basā luuñ maiñ
kaise muTThī meñ ye dhuāñ Thahre

baḌā ḳhūbsūrat suhānā khilaunā
ḳhushī kā ġhamoñ kā ḳhazāna khilaunā

hai apnī zindagī kī ye tafsīr-e-muḳhtasar
ġham mustaqil milā to ḳhushī ārizī milī

yuuñ hī aatī nahīñ ḳhushī kī bahār
saikḌoñ ġham uThāne hote haiñ

shiddat-e-rañj-o-yās meñ bhūlī huī koī ḳhushī
itnā mujhe rulā ga.ī zehn kā bojh utar gayā

tire ġham meñ ye haal to ho gayā
ḳhushī ab tirī fitnagar ho ga.ī

kabhī jo mil na sakī us ḳhushī kā hāsil hai
ye dard hī to mirī zindagī kā hāsil hai

jis bazm meñ gayā talab-e-sar-ḳhushī liye
mujh se tire ḳhayāl ne pūchhā yahāñ kahāñ

ḳhushī yahī hai ki ik din to ġham se chhūTeñge
na maut aa.e to kyā hāsil aise jiine se

dil ko ḳhushī bhī had se ziyāda nahīñ milī
kaase ke e'tibār se ġham bhī nahīñ milā

hujūm-e-ġham vo rahā umr bhar dar-e-dil par
ḳhushī isī meñ rahī ye hujūm-e-rastā de

nigāh-e-mast kī sahbā Tapak rahī hai 'nushūr'
ġhazal kahī hai tabī.at kī sarḳhushī ke liye

dil meñ ḳhushī ke phūTte yūñhī raheñ anaar
terī hañsī kī yūñhī sadā phuljaḌī rahe

vo shaḳhs jis kī ḳhushī kā baa.is thiiñ merī bāteñ
use ab un par malāl karne bhī aa ga.e haiñ

ajiib turfa-tamāshā hai zindagī merī
ḳhushī bhī aa.e to ġham be-hisāb le aa.e