Tags-Khwab

ye manzil ḳhvāb hī rahtī hamesha
agar ghar lauT kar aate nahīñ ham

us bevafā kī bazm se chashm-e-ḳhayāl meñ
ik ḳhvāb aarzū kā liye jā rahā huuñ maiñ

mujh ko to aap mire ḳhvāb meñ mil jā.eñge
niiñd akasr mirī palkoñ se gilā kartī hai

kisī ḳhayāl kisī ḳhvāb ke sivā kyā haiñ
vo bastiyāñ ki jahāñ silsila gharoñ kā hai

muḳhtalif giit mujh se marvī haiñ
muḳhtalif ḳhvāb dekhtā huuñ maiñ

kal maiñ bedār ḳhvāb-gāh meñ thā
aaj chaukhaT pe jāgtā huuñ maiñ

maiñ us ko ḳhvāb meñ kuchh aise dekhā kartā thā
tamām raat vo sote meñ muskurātī thī

jab haqīqat bhī ḳhvāb ho 'shabnam'
kyuuñ na ḳhvāboñ kā e'tibār kareñ

so.uuñ kyā āñkhoñ kī Dhele ho ga.ī haiñ sañg-e-rāh
aa ke tere ḳhvāb-gah meñ Thokareñ khātī hai niiñd

bāġh-e-jannat ko yūñhī ḳhvāb-e-adam dikhlā.egā
jis tarah kū-e-sanam mujh ko dikhā laatī hai niiñd

yār-e-gul-andām kā zaanū kahāñ ye sar kahāñ
'bahr' maiñ sotā huuñ mujh ko ḳhvāb dikhlātī hai niiñd

tū ḳhvāb-e-digar hai tirī tadfīn kahāñ ho
dil meñ to kisī aur ko dafnāyā huā hai

shahr-e-vīrāñ meñ hazāroñ ḳhvāb le kar ik diyā
zad pe tūfānoñ kī hogā aur jalā rah jā.egā

ye bhī ik un kī nigāhoñ kā karishma hai 'mubīn'
zindagī ḳhvāb kī sūrat meñ nazar aatī hai

ġhaflat-matā-e-kaffa-e-mīzān-e-adl huuñ
yā rab hisāb-e-saḳhti-e-ḳhvāb-e-girāñ na pūchh

ek shab vo ḳhvāb meñ aayā mire
dil mirā us kā pujārī ho gayā

ḳhizāñ se siina bharā ho lekin tum apnā chehra gulāb rakhnā
tamām ta.abīr us ko denā aur apne hisse meñ ḳhvāb rakhnā

huā ḳhvāb rusvā ye ishq-e-butāñ meñ
ḳhudā hī hai ab mere badnām dil kā

vo garāñ ḳhvāb jo hai naaz kā apne so hai
daad be-dād raho shab ko ki fariyād raho

maiñ naqd-e-jāñ tak luTā chukī thī nafas meñ sho.ale jalā chukī thī
tilism-e-ḳhvāb ab kahāñ se aayā ye manzil-e-be-ḳhudī na.ī hai