Tags-Khwab

is gulistān-e-gumāñ meñ ham bhī the mānind-e-ḳhvāb
garmī-e-andesha ne ham ko bhī sahrā kar diyā

us kī taraf hai amn kā parcham lagā huā
lekin mirā vo ḳhvāb meñ talvār dekhnā

vo lahū roī haiñ āñkheñ ki batānā mushkil
ab koī ḳhvāb in āñkhoñ meñ sajānā mushkil

vo bhī ai shahr-e-nigārāñ thā koī mausam ḳhvāb
biit jaane pe bhī hai jis ko bhulānā mushkil

vo būḌhā ik ḳhvāb hai aur ik ḳhvāb meñ aatā rahtā hai
is ke sar par an-dekhā panchhī mañDlātā rahtā hai

kuchh aur ḳhvāb bhī us se chhupā ke dekhe haiñ
kuchh aur chehre nigāhoñ meñ haiñ dikhā.ūñ use

narm uljhaneñ kam-sinī ke ḳhvāb
añg añg meñ chheḌā inqalāb

koī ik aadh sapnā ho to phir achchhā bhī lagtā hai
hazāroñ ḳhvāb āñkhoñ meñ sajā kar kuchh nahīñ miltā

use kahnā ki palkoñ par na Tāñke ḳhvāb kī jhālar
samundar ke kināre ghar banā kar kuchh nahīñ miltā

ḳhvāb galiyoñ meñ phir rahe the aur
log apne gharoñ meñ so.e the

ham kis ko dikhāte shab-e-furqat kī udāsī
sab ḳhvāb meñ the raat ko bedār hamīñ the

kal raat ko dekhā thā jise ḳhvāb meñ tum ne
ruḳhsār pe rakkhe hue ruḳhsār hamīñ the

guuñj uThī ġham-kada-e-rūh meñ us kī āvāz
ḳhvāb meñ bahte hue chashma-e-irfāñ kī tarah

ye soch ke uThnā har din tum is dil kā phuul khilegā zarūr
is aas pe sonā ab kī shab koī ḳhvāb nirālā aa.egā

yaañ pai-ba-pai jo ḳhvāb khule nai-ba-nai khule
jitnā judā ye ho sake utnā judā karo

saroñ pe dhuup to āñkhoñ meñ ḳhvāb patthar ke
vo sañg-dil the so utre azaab patthar ke

dhaḌaktī qurbatoñ ke ḳhvāb se jaage to jaanā
zarā se vasl ne kitnā akelā kar diyā hai

tirī badan meñ mere ḳhvāb muskurāte haiñ
dikhā kabhī mere ḳhvāboñ kā ā.īna mujh ko

aisī ḳhushī ke ḳhvāb se jaagā ki aaj tak
ḳhush ho ke so sakā na kabhī so ke ḳhush huā

aaj hī dekhe the armānoñ ke ḳhvāb aur aaj hī
kuchh na.e halqe nazar zanjīr-e-pā meñ aa.e haiñ