Tags-Kiss

sach hai tū bad-gumāñ hai samajhtā hai kuchh kā kuchh
bosa na lenā thā tire ā.īne kā mujhe

bosa bhī mujhe denā hoñToñ meñ bhī kuchh kahnā
jiine kī davā denā marne kī duā karnā

jo vo ba.ad bosa ke naaz se zarā jhiḌke hai to 'nazīr' ko
kabhī misrī hai kabhī qand hai kabhī shahd hai kabhī raab hai

kyā ye kam hai ki āḳhirī bosa
us jabīñ par raqam kiyā gayā hai

kyā nazākat hai ki bosa lete hī
hoñT par us gul ke tab ḳhāle paḌe

bosa har vaqt ruḳh kā letā hai
kis qadar gesū-e-dotā hai shoḳh

us vaqt dil pe kyūñke kahūñ kyā guzar gayā
bosa lete liyā to sahī lek mar gayā

zauq meñ sūrat-e-mauj aa ke fanā ho jā.ūñ
koī bosa to bhalā ai lab-e-sāhil denā

ek bosa hoñT par phailā tabassum ban gayā
jo harārat thī mirī us ke badan meñ aa ga.ī

bosa leñ ġhair deñ sazā ham ko
ham haiñ mujrim ḳhatā kare koī

ham to na la.al-e-lab kā tire bosa le sake
rakhte haiñ ye ḳhayāl jo be-Dhañg log haiñ

jab kahā merā faqat hai ek bose kā savāl
bole daulat husn kī kyā hai luTāne ke liye

ḳhvāb meñ bosa liyā thā raat ba-lab-e-nāzukī
sub.h dam dekhā to us ke hoñTh pe but-ḳhāla thā

ek bosa pe jo dil detā hai 'sābir' le lo
mol kam hai magar ai jaan ye maal achchhā hai

bosa le kar mere māthe kā kisī ne ye kahā
tū jahāñ bhī jā.egā mere havāle jā.egā

bosa dete nahīñ aur dil pe hai har lahza nigāh
jī meñ kahte haiñ ki muft aa.e to maal achchhā hai

kyuuñ zulf kā bosa mujhe lene nahīñ dete
kahte haiñ ki vallāh pareshāñ na kareñge

dījiye ruḳhsat-e-bosa nahīñ le baiTheñge
pyāre ye yaad rahe jaan bhī de baiTheñge