Tags-Kitab

dūsre kī kitāb ko na paḌheñ
aise ahl-e-kitāb dekhe haiñ

jise paḌhā nahīñ tum ne kabhī mohabbat se
kitāb-e-zīst kā vo baab haiñ mire aañsū

lafz kun kā thā muḳhtasar sā lafz
dar-haqīqat ye ik kitāb huā

raushnī mil jaa.e to matlab ibārat kā samajh
hai kitāb-e-ḳhāk meñ kālak se kuchh likkhā huā

dekhne vaale ye kahte haiñ kitāb-e-dahr meñ
tū sarāpā husn kā naqsha hai maiñ tasvīr-e-ishq

nafrat kā bhī javāb mohabbat se dījiye
likkhā yahī hai dil kī muqaddas kitāb meñ

tar-dāmanī meñ aa.e nazar ham hī pesh pesh
a.amāl-e-zindagī ke hisāb-o-kitāb meñ

yuuñ to bahut sī bāteñ haiñ dil kī kitāb meñ
lekin hai ġham kā tazkira har ek baab meñ

zāhid marīz-e-ishq pe ho sharb-e-mai harām
baare ye mas.ala hai tirī kis kitāb kā

riñd vaa.iz se kyuuñ ki sarbar ho
us kī chhū, kī kitāb aur hī hai

ga.e zamānoñ kī dard kajlā.ī bhūlī bisrī kitāb paḌh kar
jo ho sake tum se aane vaale dinoñ ke rañgīn ḳhvāb likhnā

varaq varaq na pareshān rah havāoñ meñ
hurūf-e-arz-e-tamannā hai to kitāb meñ aa

surme kā til banā ke ruḳh-e-lā-javāb meñ
nuqta baḌhā rahe ho ḳhudā kī kitāb meñ

bikhar rahā hai kitāb-e-jahāñ kā shīrāza
qayāmat aane se pahle ye kyā qayāmat hai

yuuñ qaus-e-chashm meñ aayā vo bārishoñ kī tarah
ki harf-e-dīd ka.ī rañgoñ kī kitāb huā

ye bāteñ aaj kī kal jis kitāb meñ likhnā
tum apne jurm ko mere hisāb meñ likhnā

us ne qubūliyat kī sanad jab se dī mujhe
sab harf is kitāb se aage chale ga.e

kitāb-e-ishq paḌhnī chāhiye tujh ko bhī ai nāseh
baḌā dilchasp hai ek ek baab avval se āḳhir tak

hazāroñ rañg sameTe hue hai āñkhoñ meñ
vo shā.irī kī mukammal kitāb jaisā hai

madrasa merā merī zaat meñ hai
ḳhud moallim huuñ ḳhud kitāb huuñ maiñ