Tags-Kitab

hamārā har din kitāb kā ek baab hai aur
kitāb vahshat kī dāstānoñ pe mushtamil hai

mutāle.a kī havas hai kitāb de jaao
hamāre ahd ko sāleh nisāb de jaao

kitāb-e-zindagī kī ye muqaddas āyateñ haiñ
hiran chītal chikāre titliyāñ jugnū parinde

mirī zindagī kī kitāb kā hai har ik varaq yuuñ sajā huā
kahīñ āñsuoñ se likhā huā kahīñ shoḳhiyoñ se bharā huā

tabī.atoñ ko sambhāle hue dhueñ kī lakīr
varaq kitāb-e-nafas ke ulaT rahī hogī

kitāb vaqt kī āñdhī meñ khul ga.ī shāyad
havā meñ uḌ gayā derīna dostī kā varaq

mohabbatoñ ke hasīñ baab se zarā aage
kitāb-e-zīst meñ miltā hai gumrahī kā varaq

hamāre dard ko paḌh lo khulī kitāb haiñ ham
har ek chehra ye kahtā dikhā.ī detā hai

kitāb-e-ārzū ke gum-shuda kuchh baab rakkhe haiñ
tire takiye ke nīche bhī hamāre ḳhvāb rakkhe haiñ

havā-e-dahr se bikhrā hai dil kā shīrāza
varaq varaq nazar aatī hai ye kitāb mujhe

bikhar chale haiñ bikhar chuke haiñ gul-e-ibārat ke barg-reze
kitāb-e-jāñ kī shahādatoñ kā varaq varaq le ga.iiñ havā.eñ

kahāñ tak aap chhupā.eñge dāstān-e-sitam
kitāb-e-jism pe ab bhī ka.ī nishān se haiñ

merī kitāb rasm-e-jahāñ hai vagarna maiñ
vo sāhib-e-kitāb huuñ jo be-kitāb thā

ye kitāb-e-dil kī haiñ āyateñ maiñ batā.ūñ kyā jo haiñ nisbateñ
mire sajda-hā-e-davām ko tire naqsh-hā-e-ḳhirām se

imtihāñ sar par hai laḌke laḌkiyāñ haiñ aur kitāb
date-shēt aa.ī to goyā aa gayā yaum-ul-hisāb

jild-e-badan hai taḳhta-e-mashq-e-sipāh-e-ġham
rahtī hai ye kitāb risāloñ ke sāmne

ahl-e-kitāb haiñ saf-e-mizhgāñ ke rū-ba-rū
kāġhaz ke daste aa.e risāloñ ke sāmne

maiñ kitāb-e-zindagī kā ek lafz-e-mustaqil
vaqt ne tashrīh kī to hāshiyoñ meñ baT gayā

apnī zabāñ se kis tarah qissa-e-ġham bayāñ karūñ
paḌhiye mirī nigāh ko dil kī kitāb jaan ke

muravvatoñ kī masarratoñ kī kahāniyāñ darj kī ga.ī thiiñ
jagah jagah se phaTī paḌī hai na kholo ab vo kitāb baabā