Tags-Kitab

maiñ bhuul aayā khol kar kitāb-e-umr paḌhte vaqt
sahāb-e-ġham jo guzrā kal varaq varaq bhigo gayā

kitāb kah kar samajhnā chāhūñ
to aql ye baat bhī na maane

vo kitāb-e-sulh kā sar-varaq ki miTā.ī kashmakash-e-firaq
vo qatīl-e-ḳhanjar-e-sabr-o-haq ki vatan pe ḳhud ko miTā diyā

khulī kitāb thī phūloñ-bharī zamīñ merī
kitāb merī thī rañg-e-kitāb us kā thā

pahchān jin se thī vo havāle miTā diye
us ne kitāb-e-zāt kā safha badal diyā

kitāb-e-umr meñ ik vo bhī baab hotā hai
har ik savāl jahāñ lā-javāb hotā hai

mirī kitāb meñ us kā bayān sach hī to hai
ki mere zehn pe chhā.ī huī hai zaat us kī

atā-e-husn thī 'qais' ik jhalak meñ shoḳh ġhazal
kitāb likhtā maiñ us par magar vo phir na milī

kitāb baab ġhazal sher bait lafz hurūf
ḳhafīf raqs se dil par ubhāre mast parī

vahī rivāyat gazīda-dānish vahī hikāyat kitāb vaalī
rahī haiñ bas zer-e-dars tere kitābeñ pichhle nisāb vaalī

mire ye afkār tere fikr-o-nazar kī tathīr haiñ mirī jaañ
maiñ hikmateñ tujh ko de rahā huuñ vahī ḳhudā kī kitāb vaalī

shāmil thā ye sitam bhī kisī ke nisāb meñ
titlī milī hanūt purānī kitāb meñ

bazm-e-hastī meñ hañgāma barpā kiye koī giitā liye koī qur.āñ liye
maiñ bhī saaqī ke hāthoñ se paa.ī thī jo le ke apnī sunahrī kitāb aa gayā

mohabbateñ bhī likhī huī haiñ adāvateñ bhī likhī huī haiñ
kitāb-e-dil meñ to jiine marne kī muddateñ bhī likhī huī haiñ

maiñ nuqta nuqta utar kar tirī nigāhoñ meñ
varaq varaq tire dil kī kitāb dekhūñgā

tumhāre naam ke nīche khiñchī huī hai lakīr
kitāb-e-zīst hai saada is indirāj ke ba.ad

paḌh saktā huuñ maiñ jald kitāb-e-ruḳh-e-raushan
chāhūñ to mazāmīn-e-maqālāt batā duuñ

mirī hayāt ko be-rabt baab rahne de
varaq varaq yuuñ hī ġham kī kitāb rahne de

paḌh chuke haiñ nisāb-e-tanhā.ī
ab likheñge kitāb-e-tanhā.ī

agar hai ilm jo tujh ko amal ke dar pe ho
vagarna shaiḳh Dubā de kitāb dariyā meñ