Tags-Kitab

ham ahl-e-dard pukāre ga.e sahīfoñ meñ
ham ahl-e-ishq utāre ga.e kitāb ke saath

dekho tum gintī numberoñ ke hisāb
kitāb meñ mat jaao

kitāb-e-muqaddar bhī naqsh-e-izāfa na utre
to batn-e-tafakkur ko ummīd ke nān-e-shīrīñ se bhar kar

ho nahīñ saktā tirī is ''ḳhush-mazāqī'' kā javāb
shaam kā dilkash samāñ aur tere hāthoñ meñ kitāb

mire yaqīn meñ gunjā.ish-e-dalīl nahīñ
javāz DhūñDne vaale kitāb le aa.e

'mīr' kī ek ġhazal sā dil-afroz
ik muqaddas kitāb jaisā ishq

paḌh chuke haiñ nisāb-e-tanhā.ī
ab likheñge kitāb-e-tanhā.ī

ḳhudā kī nazmoñ kī kitāb saarī kā.enāt hai
ġhazal ke sher kī tarah har ek fard fard hai

da.avā to apne ilm kā sab ko hai ai 'ziyā'
kyā chiiz hai kitāb koī jāntā nahīñ

vo bhī thā ek varaq saada kitāb
harf-e-be-saut-o-sadā thā maiñ bhī

bikhar bikhar sī ga.ī hai kitāb sāñsoñ kī
ye kāġhzāt ḳhudā jaane kab kahāñ uḌ jaa.eñ

jasta jasta paḌh liyā karnā mazāmīn-e-vafā
par kitāb-e-ishq kā har baab mat dekhā karo

surūr o ġham hai kyā 'ḳhālid'-miyāñ
kitāb-e-zīst kī tafsīr hai

maiñ kyā karūñgī ye itnī kahāniyāñ le kar
mire liye to faqat ik kitāb kaafī hai

mirī raat merā charāġh merī kitāb de
mirā sahrā bāñdh le paañv se mujhe aab de

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

log chun leñ jis kī tahrīreñ havāloñ ke liye
zindagī kī vo kitāb-e-mo'tabar ho jā.iye

shāyad yahī kitāb-e-mohabbat ho lā-javāb
merī vafā ke saath hai terī jafā bahut

use batānā ki us kī yādoñ ke saare safhe jalā chukā huuñ
kitāb-e-dil meñ raqam the jitne vo baab saare jhulas ga.e haiñ

kitāb-e-zīst ke mafhūm ko samajhte hī
yahāñ baḌe baḌe gyānī kā rañg uḌne lagā