Tags-Kitab

ham bhī kitāb-e-zīst ko paḌhte chale ga.e
ek ek harf-e-ġham pe aTakne ke bāvajūd

aur zindagī ko kitāb
samajh lene vaale

us ko paḌhnā to chuum kar paḌhnā
vo ḳhudā kī kitāb hai pyāre

vo ġhazal kī kitāb hai pyāre
us ko paḌhnā savāb hai pyāre

mire qalam kī siyāhī kā ek qatra hai
mirī kitāb se ik iqtibās hai duniyā

varaq varaq pe hai bikhrā mire vajūd kā rañg
ye kis ke haath kī likkhī huī kitāb hai ishq

zamīñ pe maktab-e-ādam kā ik nisāb hai ishq
likhī ga.ī jo azal meñ vahī kitāb hai ishq

jauhar-e-haq nahīñ milā mujh ko kisī kitāb meñ
miTTī se sun rahā huuñ maiñ ālī-nasab kahāniyāñ

bichhaḌ gayā huuñ magar yaad kartā rahtā huuñ
kitāb chhoḌ chukā huuñ paḌhā.ī jaarī hai

kitāb-e-sīrat-o-aḳhlāq de insāñ ke hāthoñ meñ
taraqqī dānish-o-ījād kī nākām hai saaqī

abhī to nā-mukammal nazm kā ik āḳhirī misra kitāb-e-hijr meñ tahrīr karnā hai
ḳhas-o-ḳhāshāk-e-ġham aslāf meñ taqsīm ho jaa.eñ to sar se bojh utre

jab mil na paayā us se mujhe izn-e-guftugū
maiñ ik kitāb ban gayā iz.hār-e-ishq meñ

alfāz meñ band haiñ ma.ānī
unvān-e-kitāb-e-dil khulā hai

muhīb rātoñ ke jañgaloñ meñ abad ke jaisā sukūt ho jab
lahū kā apne diyā jalānā aur apnā chehra kitāb rakhnā

sub.h paḌhtā huuñ shaam paḌhtā huuñ
tū mukammal kitāb kī sī hai

tū jo paḌhtā hai bū-alī kī kitāb
kyā ye aalim koī kitāb nahīñ

ik kitāb-e-vajūd hai to sahī
shāyad is meñ duā kā baab nahīñ

ham kitābī sadā ke haiñ lekin
hasb-e-manshā koī kitāb nahīñ

'kaif' meñ huuñ ek nūrānī kitāb
paḌhne vaalā kam-nazar hai kyā karūñ

har varaq ik kitāb ho jaa.e
aks-e-jalva naqāb ho jaa.e