Tags-Kitab

'sadā' ke paas hai duniyā kā tajraba vaa.iz
tumhārī baat meñ bas falsafa kitāb kā hai

naqsh haiñ ab varaq varaq dil par
chand yādeñ kitāb kī sūrat

ik umr ho ga.ī hai yahī sochte hue
apnī kitāb-e-zīst kā hai iqtibās kyā

virāsatoñ kī kitāb kholī to naam merā kahīñ nahīñ thā
maiñ chup thī sochā ki is meñ shāyad mire qabīle kī bhī razā thī

kitāb-e-ḳhāk paḌhī zalzale kī raat us ne
shaguft-e-gul ke zamāne meñ vo yaqīñ laayā

'shāyān' tujh ko aarzū jannat kī hai agar
dil ko lagā le apne ḳhudā kī kitāb se

phir yaad aa ga.e vahī collage ke din mujhe
sūkhe gulāb nikle purānī kitāb se

koī bhī shakl mukammal kitāb ban na sakī
har ek chehra yahāñ iqtibās jaisā hai

bārūd ke badle hāthoñ meñ aa jaa.e kitāb to achchhā ho
ai kaash hamārī āñkhoñ kā ikkīsvāñ ḳhvāb to achchhā ho

maiñ ahl-e-kitāb ko hamesha
paḌhtā huuñ kitāb se ziyāda

udhar se collage kī ek laḌkī bhī apne collage ko jā rahī hai
kitāb daabe qadam baḌhā.e shabāb thāme nazar jhukā.e

qaazī ḳhabar le mai ko bhī likkhā hai vaañ mubāh
rishvat kā hai javāz tirī jis kitāb meñ

paḌh rahā huuñ us kitāb-e-jism kī ik ik varaq
nuur sab āñkhoñ kā khiñch kar uñgliyoñ meñ aa gayā

kyā maze kī kitāb hai ye dil
jis ne bhī paḌh liyā lagā achchhā

sāmne ik kitāb adh-khulī aur maiñ
be-sabab sham.a jaltī huī aur maiñ

kitāb meñ jo likhā hai durust hai lekin
hamāre ḳhvāb kī ta.abīr aur hī kuchh hai

varaq varaq pe tirā naam jis meñ likkhā hai
vafā-o-mehr kī vo dil kitāb hai ki nahīñ

is kitāb-e-dar-e-tamannā par
hai tire intisāb kī chaukhaT

jab bhī koī kitāb likkhūñgā
tere naam intisāb likkhūñgā

dho diyā sab ko dīda-e-tar ne
vo nahīñ dars vo kitāb nahīñ