Tags-Lab

lab-e-dariyā pe chāñdnī dekhūñ
ho agar mujh se āshnā saaqī

chal dāman o āstīñ tujhe kyā
lab-ḳhushk huuñ yā maiñ chashm-tar huuñ

saaqī mai-e-gul-rañg mire lab se milā dekh
jis vaqt bahakne maiñ lagūñ tab tū maza dekh

vo lab haiñ ki do misre aur donoñ barābar ke
zulfeñ ki dil-e-shā.ir par chhā.ī huī ġhazleñ

akasr lab-e-la.alīñ ke tabassum kī kiran ne
ummīd ke ḳhākoñ meñ nayā rañg bharā bhī

nahīñ jo terī ḳhushī lab pe kyuuñ hañsī aa.e
yahī bahut hai ki āñkhoñ meñ kuchh namī aa.e

jāñ-ba-lab ko nahīñ iifā kī tavaqqo.a ḳhud bhī
apne va.ade se bilā-vaj.h mukarte kyuuñ ho

phuul kī tarah mire jism kā har lab khul jaa.e
pañkhuḌī pañkhuḌī un hoñToñ kā saayā dekhūñ

dam-e-āḳhir ye thā mire lab par
kis pe jaur-o-sitam kareñge aap

tire dil se tire lab tak tirī āñkhoñ se mizhgāñ tak
mohabbat be-qarār aa.ī muravvat sharmsār aa.ī

ārzū-e-chashma-e-kausar na.iiñ
tishna-lab huuñ sharbat-e-dīdār kā

nadī hai mauj meñ apnī use is kī ḳhabar kyā hai
ki tishna-lab musāfir kis pareshānī se aayā hai

mast ho saktā hai tū 'maḳhmūr' lekin is tarah
aañkh meñ sāġhar lab-e-rañgīñ meñ sahbā chāhiye

haañ ta.ana-e-aġhyār ke nashtar hī se khul jaa.e
ik zaḳhm rahegā lab-e-guftār kahāñ tak

ġham meñ har lab pe vahī āh-o-bukā aatī hai
muḳhtalif saaz haiñ aur ek sadā aatī hai

nāzukī us ke lab kī kyā kahiye
pañkhuḌī ik gulāb kī sī hai

ai jāñ-ba-lab rasīda itnā
rahnā hai ki tā javāb aave

phir hijr kī lambī raat miyāñ sanjog kī to yahī ek ghaḌī
jo dil meñ hai lab par aane do sharmānā kyā ghabrānā kyā

aan ke is bīmār ko dekhe tujh ko bhī taufīq huī
lab par us ke naam thā terā jab bhī dard shadīd huā