Tags-Lab

jo lab-kushāda the vo mudda.ī bane lekin
jo dil-kushāda the vo kaam aa ga.e sab ke

lab rahe ḳhāmosh lekin saarī bāteñ ho ga.iiñ
ik nazar meñ kah ga.e afsāna-dar-afsāna ham

hayā bhī aañkh meñ vāraftagī bhī
badan meñ pyaas lab par ḳhāmushī bhī

jabīñ pe nāgāh paḌne vaalī shikan agar mustaqil huī hai
to zer-e-lab muskurāte rahne kī achchhī aadat se muñh na moḌūñ

vo jab apne lab kholeñ
shahd fazāoñ meñ gholeñ

is ittifāq ko fazl-e-ḳhudā samajh vaa.iz
ki hajv-e-mai tire lab par thī mujh ko hosh na thā

pahuñchtā hai har ik mai-kash ke aage daur-e-jām us kā
kisī ko tishna-lab rakhtā nahīñ hai lutf-e-ām us kā

jise bhulā na sakā us ko yaad kyā rakhtā
jo naam lab pe rahā zehn se utar bhī gayā

lab-o-ruḳhsār ātishīñ us ke
shabnamī raqs thā sharāre par

jo bosa dete haiñ to lab bachāte haiñ lab se
lipaTte bhī haiñ to siina churā ke siine se

aa ga.ī lab tak āh-e-ātish-bār
ab ḳhudā hai nigāh-bān-e-qafas

bazm-e-azā-e-dost meñ ġham na sahī tarab sahī
hañs na sako jo khul ke tum to ḳhanda-e-zer-e-lab sahī

na aayā koī lab-e-bām shaam Dhalne lagī
vufūr-e-shauq se āñkhoñ meñ ḳhuun aa bhī gayā

tardīd-e-jahālat kī sazā maut hai chup huuñ
ab kaun yahāñ khol ke lab munkir-e-dīñ ho

mushtāq huuñ tujh lab kī fasāhat kā va-lekin
'rāñjhā' ke nasīboñ meñ kahāñ 'hīr' kī āvāz

idhar vo tishna-labī hai ki jāñ-ba-lab haiñ ham
udhar vo dast-e-karam par sarāb le aa.e

lab pe duā.eñ aañkh meñ aañsū jalte haiñ
milne aur bichhaḌne vaalā koī to ho

mere lab-e-vajūd par sūkhe paḌe hue haiñ lafz
maujoñ zamāna ho gayā us se suḳhan kiye hue

tamām harf mire lab pe aa ke jam se ga.e
na jaane maiñ ne kahā kyā aur us ne samjhā kyā

zer-e-lab rakh chhupā ke naam us kā
lafz hote haiñ kuchh bayāñ se ḳharāb