Tags-Lab

sukūt toḌe kabhī tū bhī dil kī baat kahe
ḳhudā kare kabhī tere bhī lab pe aa.e suḳhan

de ke ik bosa-e-lab-e-jāñ-baḳhsh
tan-e-be-jāñ meñ jaan Daalī hai

kiyā qatl us ne mujh ko maiñ ne kī qātil kī ārā.ish
jamāyā ḳhuun kā lākhā lab-e-shamshīr-e-burrāñ par

lagāyā itr jab ham ne lab-e-rañgīn-e-jānāñ par
to goyā tel chhiḌkā ātish-e-la.al-e-badaḳhshāñ par

miltā hai mauj mauj mujhe tū kabhī kabhī
ubhrā hai terā aks lab-e-jū kabhī kabhī

tujh lab kī sifat la.al-e-badaḳhshāñ suuñ kahūñgā
jaadū haiñ tire nain ġhazālāñ suuñ kahūñgā

vo hañse vo zer-e-lab kuchh kah uThe
ḳhvāb se dikhlā rahī hai un kī yaad

ham dekheñ kis din husn ai dil us rashk-e-parī kā dekheñge
vo qad vo kamar vo chashm vo lab vo zulf vo mukhḌā dekheñge

kal tak maiñ aur tū the bāham raqs-e-sabā aur ḳhanda-e-gul
aaj tire lab yās-guzīda merā harf-e-shauq figār

har zaḳhm pe dekhī haiñ tire pyaar kī mohreñ
ye gul bhī khilā.e haiñ terī surḳhi-e-lab ne

kī tū ne lab-kushā.ī to kis ke huzūr kī
ab kirchiyāñ sameT dil-e-nā-subūr kī

tabassum-e-dil-navāz bhī ai 'nāz'
lab-e-gul-e-pā.emāl tak thā

jī meñ hai phir kareñ iz.hār-e-vafā
phir tire larze hue lab dekheñ

jahāñ lab koshish-e-iz.hār-e-matlab ko taraste haiñ
vahāñ har saañs ko ik dāstāñ kahnā hī paḌtā hai

haqīqatoñ meñ bhī thī 'shāz' rañg-āmezī
qasīda-e-lab-o-āriz kā fan hī aisā thā

ham jām-e-mai ke bhī lab-e-tar chūste nahīñ
chaskā paḌā huā hai tumhārī zabān kā

palkoñ pe koī hai lab-e-iz.hār kī sūrat
rakhtā huuñ maiñ ḳhanjar pe zabāñ dekhte rahnā

pyāse lab aur jalte ḳheme, tīr-o-ḳhanzar siine meñ
nasl-e-nau pe un ke 'ahsan' kitne haiñ ehsān na pūchh

bosa-e-lab ġhair ko dete ho tum
muñh mirā mīThā kiyā jaatā nahīñ

daad bhī detā na thā vo mere jazb-e-shauq kī
ḳhāmushī āñkhoñ meñ lab par harf-e-goyā.ī na thā