Tags-Lab

shikva bedād kā to kyā 'maikash'
lab se naala bhī āshnā na huā

aañsū mirī āñkhoñ meñ haiñ naale mire lab par
saudā mire sar meñ hai tamannā mire dil meñ

rañg judā karne ke liye chashm-o-lab ke
qaus-e-quzah andhoñ meñ rakkhī jaatī hai

lab pe aa aa ke rahī jaatī haiñ kitnī bāteñ
hameñ kahnā to bahut kuchh hai magar jaane do

jo dard-e-hijrāñ se jāñ-ba-lab hai ilaaj mumkin hai us kā kyūñkar
masīh samjhe haiñ jis ko vo ḳhud maraz meñ ulfat kī mubtalā hai

jin ne dekhe tire lab-e-shīrīñ
nazar us kī nahīñ shakar kī taraf

tamāshā dekhte the hamāre zabt-e-ġham kā
musallat ek Dar thā lab-e-iz.hār chup the

kitnī baar bulāyā us ko
lekin us ke lab larze

kuchh baat thī jo lab nahīñ khulte the hamāre
tum samjhe the gūñgoñ ke zabāneñ nahīñ hotīñ

tarjumān-e-rāz huuñ ye bhī kaam hai mirā
us lab-e-ḳhamosh ne mujh se jo kahā kahūñ

kal raat zindagī se mulāqāt ho ga.ī
lab thartharā rahe the magar baat ho ga.ī

tum samajhte ho mirī be-zehnī meñ hai kalām
lab-e-goyā kī qasam zikr yahāñ hai kuchh aur

lab-e-shīrīñ se agar ho na terā lab shīrīñ
kohkan tū bhī to ab dāman-e-kohsār na chhoḌ

vaqt hai ab namāz-e-maġhrib kā
chāñd ruḳh lab shafaq hai gesū shaam

ab to rusvā.iyāñ yaqīnī haiñ
un ke lab par mirā fasāna hai

dhuup meñ dasht-e-tanhā.ī kī mere jalte hoñToñ ko
lams apne gul-barg lab kā de jaatā hai jaane kaun

ham harf-e-zer-e-lab the hameñ kaun roktā
lafzoñ ke tum ne jaal bichhā.e to uTh ga.e

hotel sabza lawn lab-e-jū
ghirTā abr ghaTā meñ utrā

duurī kī dāstān meñ ye bhī kahīñ pe darj ho
tishna-labī to hai vahī chashma-e-lab badal gayā

misī-mālīda lab-e-yār kī sun kar tārīf
muñh phulā.e hue hai ġhuncha-e-sausan kaisā