Tags-Lab

ḳhamoshī kā koī to bhed kholo
jo lab khulte nahīñ āñkhoñ se bolo

salīqa bolne kā ho to bolo
nahīñ to chup bhalī hai lab na kholo

na pūchho bebasī us tishna-lab kī
ki jis kī dastaras meñ jaam bhī hai

lab shikāyat ko kahīñ hil jāveñ to phir zabt kyā
ek kyā sau baar bande ko satā kar dekh lo

aah dil se lab tak aa saktī nahīñ
dard hotā hai to hone dījiye

yuuñ na kho jaate fazā-e-yās meñ duniyā ke saath
kaash apnā hī lab-o-lahja rajā.ī dekhte

vo harf jis se hai mansūr o daar ko nisbat
lab-e-junūñ pe mukarrar nahīñ to kuchh bhī nahīñ

kisī kī zulf nahīñ lab kī garmiyāñ bhī nahīñ
guloñ pe aaj to āvāra titliyāñ bhī nahīñ

tū jafā meñ mast hai roz-o-shab maiñ kafan-ba-dosh o ġhazal-ba-lab
tire ro.ab-e-husn se chup haiñ sab maiñ bhī chup rahūñ to mazā hai kyaa?

āġhosh-e-tasavvur meñ jab maiñ ne use maskā
lab-hā-e-mubārak se ik shor thā ''bas bas'' kā

ham ki maiḳhāne ke vāris the haiñ ab tak tishna-lab
chand kam-zarfoñ ko sahbā kā ijārā mil gayā

saaqī mire bhī dil kī taraf Tuk nigāh kar
lab-tishna terī bazm meñ ye jaam rah gayā

javāb-e-tohmat-e-ahl-e-zamāna meñ 'ḳhurshīd'
yahī bahut hai ki lab sī rakho safā.ī na do

tere kirdār par haiñ shāhid-e-hāl
ḳhushk-lab aur chashm-e-tar ai dil

logo lab kholo kuchh bolo jhelum hai maTiyālā kyuuñ
maiñ ne jab is ko dekhā thā ye thā ik ā.īnā sā

kahīñ duniyā kahāñ us ke taqāze
vo terā mai-kada ye merā lab hai

hijr meñ jab ḳhayāl-e-yār aayā
lab pe naala hazār baar aayā

tumhāre shahr ke lab-basta shā.iroñ meñ se huuñ
mire liye bhī koī harf-e-be-navā rakhnā

abr-e-naisāñ kā ḳhavās un kī nasīhat meñ thā
lab-e-shīrīñ se guhar-bār gurū-nānak the

lafz us shoḳh kā muñh dekh ke rah jaate haiñ
lab-e-iz.hār kī hasrat nahīñ dekhī jaatī