Tags-Lab

batā deñgī havā.eñ har kisī ko
lab-e-ashjār par qissa hai jo kuchh

kyoñ lafz mere lab pe Thaharte haiñ abad tak
kyā naql-e-makānī mire lahje meñ nahīñ hai

tabassum-e-lab-e-sāqī chaman khilā hī gayā
nashāt-e-fasl-e-bahārāñ diloñ pe chhā hī gayā

kabhī vo tabassum-e-zer-e-lab kabhī ḳhāmushī se vo be-sabab
kabhī sarḳhushī kabhī aañkh nam tumheñ yaad ho ki na yaad ho

jab bhī aatī hai koī fitna jagā detī hai
terī muskān tire lab pe sharīroñ kī tarah

apne hī aks ko paanī meñ kahāñ tak dekhūñ
hijr kī shaam hai koī to lab-e-jū aa.e

maiñ dekhne meñ bahut mahv thā tirī tasvīr
ki chūmne ko mujhe tere lab nikal aa.e

sar-e-āb-jū rahe tishna-lab to ye zabt-e-ġham kī hai intihā
mire haal pe the jo nukta-chīñ mirā hausla bhī to dekhte

so dekh kar tire ruḳhsār o lab yaqīñ aayā
ki phuul khilte haiñ gulzār ke alāva bhī

lab-e-nigār ko zahmat na do ḳhudā ke liye
ham ahl-e-shauq zabān-e-nazar samajhte haiñ

lab-e-dīvār-o-dar to patthar the
tere aage ḳhamosh thī maiñ bhī

chalo 'faiz' dil jalā.eñ kareñ phir se arz-e-jānāñ
vo suḳhan jo lab tak aa.e pe savāl tak na pahuñche

ye alag baat mayassar lab-e-goyā na huā
dil meñ vo dhuum ki sunte haiñ zamāne vaale

nahīñ hai sarnavisht us kī lab-e-jāñ-baḳhsh-shīrīñ kī
kare jāñ-kandanī farhād jitnā us kā jī chāhe

duur se dekh vo lab kāTte haiñ apne hoñTh
hai abhī pās-e-adab hoñTh hilā sakte nahīñ

jumbish-e-lab hai dam-e-naz.a ye kuchh kahtā hai
sun to lo apne zarā mā.il-e-guftār kī arz

abhī huuñ phuul par shabnam kā qatra
abhī lab par koī harf-e-duā huuñ

suḳhan to man kī mauj hai kahā jo lab pe aa gayā
zamāna daad de na de bashar hai nukta-chīñ to kyā

sar-e-tūr jis kī juuyā thī nigāh-e-chashm-e-mūsā
vahī ik jhalak faroġh-e-lab-e-bām ban ke aa.ī