Tags-Lab

barq-e-āvāz jalā de ye niyastān-e-jahāñ
sāz-e-hastī se hai sāz-e-lab-e-e.ajāz judā

yuuñ hī kyā kam hai tirī yaad ki dil ko chheḌeñ
zulf-e-pur-ḳham lab-e-rañgīñ nigah-e-nāz judā

jigar meñ Tiis lab hañsne pe majbūr
kuchh aisī hī hamārī zindagī hai

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

ek samundar aañkh meñ thā maujzan 'tālib' magar
umr-bhar ham tishna-lab bhaTkā kiye sahrāoñ meñ

tanik to lutf se kuchh kah ki jāñ-ba-lab huuñ maiñ
rahī hai baat mirī jaan ab koī dam kī

ham lab-e-gor ho ga.e zālim
tū lab-e-bām kyuuñ nahīñ aatā

dam kā aanā to baḌī baat hai lab par 'ārif'
zo.af ne harf-e-shikāyat kabhī aane na diyā

jaañ mutrib-e-tarāna-e-hal-mim-mazīd hai
lab parda-sañj-e-zamzama-e-al-amāñ nahīñ

mile agar lab-e-shīrīñ kā tere ik bosa
to lutf ho mujhe albatta yaar eid ke din

piye haiñ ashk hazāroñ to lab pe aa.ī hai
vo ik hañsī ki jise farz-e-nāgavār kaheñ

maanā ki lab-e-zaḳhm duhā.ī nahīñ detā
mahram bhī to vo dast-e-hinā.ī haiñ detā

aao nudrat-'navāz' lauT chalo
vo kahāñ apne lab hilāve hai

ik tirā naam thā ubhrā jo fasīl-e-lab par
varna sakte meñ rahī saarī ḳhudā.ī pahroñ

mai-kada se ḳhum meñ aa.ī ḳhum se shīshe meñ Dhalī
mai mire lab tak na aa jā.egī paimāne se kyā

nazar-e-ahl-e-mohabbat hī samajh saktī hai
lab-e-ḳhāmosh pe hote haiñ fasāne kyā kyā

daulat se tirī sab kuchh ham paas muhayyā hai
lab ḳhushk o jigar biryāñ chashm-e-tar o dil sar de

ishq meñ ahl-e-vafā kitne aziyyat-kosh haiñ
ḳhuun dil kā ho rahā hai lab magar ḳhāmosh haiñ

ḳhāl-e-lab āfat-e-jāñ thā mujhe ma.alūm na thā
daam daane meñ nihāñ thā mujhe ma.alūm na thā

kisī dasht kā lab-e-ḳhushk huuñ jo na paa.e muzhda-e-āb tak
kabhī aa.e bhī mirī samt ko to baras na paa.e sahāb tak