Tags-Lab

marīz-e-ġham ke lab par naam un kā baar baar aayā
phir us ke ba.ad chārasāz aa.e ġham-gusār aa.e

haa.e vo us kā mauj-ḳhez badan
maiñ to pyāsā rahā lab-e-jū bhī

palkoñ pe guzrī sā.ateñ lab par gile shikāyateñ
āñsuoñ meñ hikāyateñ dhaḌkaneñ saañs siskiyāñ

hazār-hā mirī peshāniyoñ ke chāñd bujhe
hazār-hā mire lab ham-kanār-e-zahr hue

sochiye garmi-e-guftār kahāñ se aa.ī
lab-ba-lab ḳhvāhish-e-iz.hār kahāñ se aa.ī

ashk āñkhoñ se mirī nikle musalsal lekin
us ne ik harf-e-tasallī na nikālā lab se

tishna-lab dhartī pe jab bahtā hai pyāsoñ kā lahū
muddatoñ maqtal meñ sar ḳham rahte haiñ ḳhanjar tamām

ai mere nā-gufta shero ye to batāo mere ba.ad
kaun se dil meñ qarār karoge kis ke lab se adā hoge

maujoñ par lahrāte tinko chalo na yuuñ itrā ke chalo
aur zarā ye dariyā utrā tum bhī lab-e-dariyā hoge

zindagī karbalā kā ik lamha
aur pyāsā lab-e-furāt kā maiñ

karb-e-iz.hār se na guzrī baat
lab pe aane se pahle hī bikhrī

javāñ-lāshe pe haiñ shikva-ba-lab kāñdhe za.īfī ke
agar vo chāhtā ye hādisa hone nahīñ detā

unhīñ ke lab pe hai amn-o-amīñ kā afsāna
vahī jo hazrat-e-insāñ kā qatl-e-ām kareñ

jis shaḳhs ko aatā thā hunar nauhagarī kā
vo shaḳhs bhī ab ke lab-e-sāhil nahīñ Thahrā

hoñToñ pe aaj tak haiñ shab-e-aish ke maze
saaqī kā lab liyā lab-e-paimāna chhoḌ kar

lagā.ī us ne jo jo teġh abrū kī mire dil par
lab-e-har-zaḳhm se niklī bajā.e aah bismillāh

aarzū tujh se tirā bosa bhī kab māñge hai
harf-e-iqrār bas ik jumbish-e-lab māñge hai

jilā.e yā ham ko koī maare bahisht de yā saqar meñ Daale
rahegā us but kā naam lab par hamāre jab tak ki dam meñ dam hai

jagah miltī nahīñ jis ko shab-e-ġham mahshar-e-dil meñ
vo hañgāma lab-e-ḳhāmosh meñ ābād hotā hai

ham ne us ke lab o ruḳhsār ko chhū kar dekhā
hausle aag ko gulzār banā dete haiñ