Tags-Lab

band haiñ lab javāb meñ ghir gayā maiñ azaab meñ
aayā jo mere ḳhvāb meñ aisā burā tū kaun hai

dekhne vaale mirī ḳhāmoshī-e-lab ko na dekh
āñkhoñ āñkhoñ meñ fasāna kah diyā kartā huuñ maiñ

ilāhī ab koī chāra nahīñ duā ke sivā
marīz-e-hijr lab-e-dam hai kyā kiyā jaa.e

dekh kar un ke lab pe ḳhanda-e-nūr
niiñd sī ġham ko aa.ī jaatī hai

us shakar-lab kā maiñ ḳhayālī huuñ
is sabab shakkarīñ-maqālī huuñ

vo dil-āvez āñkheñ vo lab-o-ruḳhsār vo zulfeñ
nahīñ ab dekhnā kuchh bhī nahīñ us ke sivā mujh ko

kyuuñ na maiñ mushtāq nāseh kā rahūñ
naam terā us ke lab par aa.egā

muntazir hai jān-e-bar-lab-āmada
dekhiye kab phir ke qāsid aa.egā

alfāz lab-o-gesū-o-ruḳhsār haiñ us ke
ġhazloñ kī qabāoñ meñ chhupā phūl-badan hai

tujh chehra-e-gul-rañg niiñ ḳhūbāñ ko gul-gūnī diyā
tere lab yāqūt ne mujh dil kuuñ pur-ḳhūnī diyā

hashr meñ dekh ke majma.a lab-e-kausar saaqī
phir gayā āñkhoñ meñ naqsha tire maiḳhāne kā

kahīñ hotā bhī hai jāñ-baḳhsh lab-e-ahd-shikan
tere is jhūTe masīhā ko nahīñ jānte kyā

firāq-e-lab-o-zulf par munhasir kam hī paa.ī hai ahl-e-vafā kī taḌap
tum āġhosh ke tañg halqe meñ ho phir bhī har lamha afzūñ hai dil kī jalan

lab hamāre ḳhamosh rahte haiñ
aur kartī haiñ guftugū āñkheñ

hai to vaa.iz ḳhudā-parast magar
lab pe zikr-e-butāñ ziyāda hai

aaj to saaqī se ye 'bahzād' ne bāñdhā hai ahd
lab pe tauba ho magar hāthoñ meñ paimāna rahe

lab par sukūt dil meñ udāsī nazar meñ ḳhauf
merā uruuj mujh ko ye sauġhāt de gayā

tum jo chāho ki mire lab bhī na khulne paa.eñ
mere aage mirī taqdīr kā chehra rakh do

jis se vābasta rahe Dūbne vaale kī umiid
ek tinkā hī sahī tum lab-e-dariyā rakh do

qafas-e-ġham meñ dil-afsurda rahūñgā kab tak
naġhma-e-shauq señ mere lab-e-guftār kuuñ khol