Tags-Lab

tere lab ke huqūq haiñ mujh par
kyuuñ bhulā duuñ maiñ dil se haqq-e-namak

ulfat aur tum se haa.e haa.e na ho
lab-e-dushman pe aah aah nahīñ

lab par āh-e-musalsal aañkh meñ paanī hai
tanhā.ī kā har lamha nuqsānī hai

kyā batā.ūñ maiñ lab-e-dariyā se
kuchh taqāzā hai abhī tak merā

phir badan meñ thakan kī gard liye
phir lab-e-jū-e-bār haiñ ham log

kī talḳh guftugū lab-e-jāñ-baḳhsh se mudām
afyūn gholī aap ne āb-e-hayāt meñ

firāq-e-lab-o-zulf par munhasir kam hī paa.ī hai ahl-e-vafā kī taḌap
tum āġhosh ke tañg halqe meñ ho phir bhī har lamha afzūñ hai dil kī jalan

kyā taḌapte guzarte hī apne
dard-e-dil meñ hai lab par fuġhāñ hai

zer-e-lab rahā naala dard kī davā ho kar
aah ne sukūñ baḳhshā āh-e-nā-rasā ho kar

lab pe aatī hai duā ban ke ye chāhat merī
zindagī qaab ke chamchoñ kī ho sūrat merī

tamannā kuchh to le aatī hai lab par
ye kuchh qisse sunātī hai nazar se

tamām harf mire lab pe aa ke jam se ga.e
na jaane maiñ kahā kyā aur us ne samjhā kyā

ab us kī shakl bhī mushkil se yaad aatī hai
vo jis ke naam se hote na the judā mire lab

gul-e-ruḳhsāra kā nazzāra tū kar āñkheñ khol
añgbīñ chakhne ko phir dil lab-e-ḳhandān meñ aa

yaad hai shādī meñ bhī hañgāma-e-yā-rab mujhe
sub.ha-e-zāhid huā hai ḳhanda zer-e-lab mujhe

kare hai baada tire lab se kasb-e-rañg-e-faroġh
ḳhat-e-piyāla sarāsar nigāh-e-gul-chīñ hai

chhupā lete tirī sūrat ham apnī aañkh meñ dil meñ
lab-e-goyā ke hāthoñ kis liye rusvā hue ḳhud se

ho koī mauj-e-tūfāñ yā havā-e-tund kā jhoñkā
jo pahuñchā de lab-e-sāhil usī ko nāḳhudā samjho

aañkh meñ ḳhvāb nahīñ ḳhvāb kā saanī bhī nahīñ
kunj-e-lab meñ koī pahlī sī kahānī bhī nahīñ