Tags-Lab

mohabbat meñ vo bhī maqām aa gayā
ki mizhgāñ pe ḳhuuñ lab pe naam aa gayā

dekh kar tujh ko sirhāne tire bīmār-e-junūñ
jāñ-ba-lab the, so hue āh-ba-lab, kyā karte

baat karne meñ hameñ kaun sī dushvārī thī
us kī āñkhoñ se taḳhātub thā so lab kyā karte

vo ek karb-e-hasīñ jo mujhe huā hai atā
na tere ruḳh ke liye hai na tere lab ke liye

shab-o-roz lab pe hai ai 'vafā' ye duā ki maut hī de ḳhudā
jo yahī hai mere nasīb meñ ki asīr-e-dām-e-balā rahūñ

lab agar ḳhūgare-fuġhāñ hoñge
dāġh-e-dil aur bhī ayaañ hoñge

lab-e-jāñ-baḳhsh pe dam apnā fanā hotā hai
aaj iisā se ye bīmār judā hotā hai

koī samjhā rind koī muttaqī
lab pe tauba haath meñ sāġhar rahā

kisī ke lab pe 'nasīm'-e-sahar duā kaisī
yahī hai vird-e-zabāñ kaun maarā jā.egā

lab par haiñ zindagī kī duā.eñ bahar-nafas
māyūs pā rahā huuñ masīhā nazar ko maiñ

us ne sau baar haal pūchhā 'arsh'
shikva lab par na ek baar aayā

kyā jāniye marnā bhī ravā hai ki nahīñ hai
takvīn ke lab par mire jiine kī duā thī

ham ne phūloñ ko jo dekhā lab-o-ruḳhsār ke ba.ad
phuul dekhe na ga.e husn-e-ruḳh-e-yār ke ba.ad

'asar' mujhe hai vahāñ ruḳhsat-e-navā-sanjī
ki naġhma ik lab-e-ḳhāmosh jab dayār meñ hai

lab pe aate haiñ bahut zauq-e-safar ke naġhme
aur har gaam pe ārām liyā hai tum ne

sitam-zarīf yuuñ adālatoñ meñ chup khaḌe haiñ sab
ki jaise sī liye hoñ lab subūt ne gavāh ne

ab harīf sab us ke talḳh roz o shab us ke
kāñpte haiñ lab us ke us ne kyuuñ mohabbat kī

zindagī Daal rahī thī jo sitāroñ pe kamand
ab tamāshā-e-lab-e-bām huī jaatī hai

baat karne meñ jo lab us ke hue zer-o-zabar
ek saa.at meñ tah-o-bālā zamāna ho gayā

dhyān aayā jis ghaḌī us ke dahān-e-tañg kā
ho gayā dam band mushkil lab hilānā ho gayā