Tags-Lab

chuuñ zindagī-o-marg haiñ aapas meñ zid 'hasan'
chashm-o-lab us kī zid hai hayāt o mamāt kī

bolā agar to qand-e-mukarrar hue vo lab
aur chup rahā to ye bhī hai sūrat nabāt kī

surḳhī-e-aks-e-shafaq par jo paḌā lab kā gumāñ
la.al-o-yāqūt kiye ham ne nisār-e-dariyā

aa ga.iiñ jumbish meñ taslīm-o-razā kī quvvateñ
lab mile hī the pa.e shikva ki aafat ho ga.ī

''māhiyā'' gā.eñgī kūñjeñ lab-e-dariyā lekin
in kī sañgīt meñ vo baat kahāñ tere ba.ad

jab huā garm-e-kalām-e-muḳhtasar mahkā diyā
itr khīñchā yaar ke lab ne gul-e-taqrīr kā

donoñ mashkīze labā-lab
ek chumbak kī tarah

zindagī guzrī abhī is aag ke girdāb meñ
dil se kyuuñ jaane lagī hirs-lab-o-ruḳhsār abhī

āñkhoñ meñ ashk lab pe hañsī tis pe be-hisī
ye kaisā imtizāj hai ai ham-shabīh-e-man

ai zulm ke maato lab kholo chup rahne vaalo chup kab tak
kuchh hashr to un se uTThegā kuchh duur to naale jā.eñge

go talḳh vo kaheñge lab-hā-e-shakkarīñ se
har dam duā magar ham ham-dam kiyā kareñge

lab-e-rañgīñ ko kis ne chūsā hai
dekh lo ye aqiiq jhūTā hai

bosa-e-lab diyā jo bigḌe ġhair
phuuT meñ tum ne qand Daalā hai

kitnī fariyādoñ ke lab sī ke zabāñ paa.ī 'vahīd'
khel samjhe na koī naġhma-sarā ho jaanā

kisī ik zaḳhm ke lab khul ga.e the
maiñ itnī zor se chīḳhā nahīñ thā

ab shahr shahr aam hai goyā.ī kā sukūt
jab se lab-e-sukūt kī goyā.ī kam huī

vo kareñ zulm aur tum lab par na laao
varna gustāḳhī hai un kī shaan meñ

lab-e-bām aa.e tum aur un ke chehre ho ga.e phīke
qamar ne tum ko ḳhurshīd aur sitāroñ ne qamar jaanā

mirī to jumbish-e-lab bhī hai nā-ḳhushī kā sabab
ab aa.ī hai koī tarz-e-bayāñ sikhā diije