Tags-Manzil

hayāt vaqfa-e-rāhat hai rāh-rau ke liye
adam se tā-ba-adam hai safar kī ik manzil

manzil kī hai talab to hameñ saath le chalo
vāqif haiñ ḳhuub raah kī bārīkiyoñ se ham

hai ruuh tārīkiyoñ meñ hairāñ bujhā huā hai charāġh-e-manzil
kahīñ sar-e-rāh ye musāfir paTak na de bojh zindagī kā

ab bhī manzil mire qadmoñ kī tamannā.ī hai
kyā kahūñ hasrat-e-yak-gām pe ronā aayā

havā-e-shauq kī quvvat vahāñ le aa.ī hai mujh ko
jahāñ manzil bhī gard-e-kārvāñ ma.alūm hotī hai

kaun manzil kī ḳhabar de kise manzil kī ḳhabar
rāh-rau ābla-pā rāh-numā āvāra

maiñ terī manzil-e-jāñ tak pahuñch to saktā huñ
magar ye raah badan kī taraf se aatī hai

manzil-e-ishq hai kaThin yaaro
shauq kā imtihān kyā kahiye

dasht-e-talab se kah do mujh ko merī manzil batlā de
maan liyā hai ab to sarāboñ ne bhī tishna-kām mujhe

zehn ko ye āvāra socheñ kis manzil par le aa.iiñ
kitnī mushkil se yaad aayā aaj tirā bhī naam mujhe

manzil se ab duur nikal aa.e haiñ 'qais' to ḳhush haiñ
ham-sā.e ke kutte kā Dar pīchhe chhoḌ aa.e haiñ

jis raste meñ tum mil jaao
vo rasta manzil hotā hai

barbād sahī lekin barbād-e-ġham-e-dil huuñ
āñkhoñ se lagā mujh ko gard-e-rah-e-manzil huuñ

zulmat-gah-e-daurāñ meñ sub.h-e-chaman-e-dil huuñ
roko na safar merā maiñ qismat-e-manzil huuñ

nahīñ begānagī achchhī rafīq-e-rāh-e-manzil se
Thahar jā ai sharar ham bhī to āḳhir miTne vaale haiñ

agarche maiñ ḳhat-e-jāda pe ik gard-e-safar huuñ
khaTaktā huuñ magar phir bhī ki manzil kī ḳhabar huuñ

fareb-ḳhurda-e-manzil haiñ ham ko kyā mālūm
ba-tarz-e-rāhbarī rāhzan kī baat karo

mirī nazar meñ surāġh-e-manzil shu.ūr ban kar chamak rahā hai
mirī jabīñ par kaḌe safar kī masāfateñ bhī likhī huī haiñ

kahāñ kahāñ hādse chhipe haiñ ḳhabar hai ham ko
kahāñ se manzil kā rāsta hai hameñ pata hai

junūñ kī raakh se manzil meñ rañg kyā aa.e
matā-e-dard to ham raah meñ luTā aa.e