Tags-Manzil

tham ga.ī saut-e-jaras ruk ga.e rahbar ke qadam
kisī gum-karda-e-manzil ne pukārā to nahīñ

ho liye saare tamāshā.ī kisī manzil ke
rah gayā maiñ so sar-e-rāhguzar maiñ hī huuñ

luTī-luTī sī hai rāheñ miTī-miTī manzil
safar ye umr kā aksar baḌā ajiib lagā

mirī jānib koī aa.e to pūchhūñ
nishān-e-rāh huuñ manzil huuñ kyā huuñ

yārān-e-rah-e-ġhurbat kyā ho ga.e kyā kahiye
kuchh so ga.e manzil par kuchh kho ga.e rāhoñ meñ

shauq se shauq hai kuchh manzil kā
rāhbar se bhī baḌhe jaate haiñ

ahl-e-himmat ne to ai 'sīmāb' manzil maar lī
ham magar hirmāñ-nasībī kā gilā karte rahe

husūl-e-manzil-e-duniyā kuchh aisā kaam na thā
magar jo raah meñ patthar anā ke rakkhe the

maiñ kahāñ huuñ kaun sī manzil meñ huuñ koī batā.e
mujh ko apnī khoj meñ nikle hue arsa huā

suufī sādhū ban kar terī khoj meñ aise nikleñ
ḳhud hī apnā rasta manzil aur safar ho jaa.eñ

koī manzil ho himmat chāhiye sar ho hī jaatī hai
magar luTte haiñ raste meñ hazāroñ kārvāñ pahle

parbat parbat ghuum chukā huuñ sahrā sahrā chhān rahā huuñ
har manzil ke haq meñ lekin kāfir kā īmān rahā huuñ

umr bhar ḳhvāboñ kī manzil kā safar jaarī rahā
zindagī bhar tajraboñ ke zaḳhm kaam aate rahe

chalte haiñ gulshan-e-firdaus meñ ghar lete haiñ
tai ye manzil jo ḳhudā chāhe to kar lete haiñ

dil kā safar bas ek hī manzil pe bas nahīñ
itnā ḳhayāl us kā hameñ is baras nahīñ

sab chale jā.eñge ik be-nām manzil kī taraf
ghar kī taḳhtī kī jagah katbe lage rah jā.eñge

anokhī vaz.a hai saare zamāne se nirāle haiñ
ye āshiq kaun sī bastī ke yā-rab rahne vaale haiñ

maiñ ne anjām se pahle na palaT kar dekhā
duur tak saath mire manzil-e-āġhāz ga.ī

qadam qadam pe havādis ne rahnumā.ī kī
ravāñ hai jāda-e-manzil pe kārvān-e-ḳhayāl

na un kā jaada na koī manzil na nūr-o-zulmat kā farq jāneñ
unheñ ḳhabar kyā ki hai sahar kyā añdherī shab kā ḳhumār kyā hai