Tags-Manzil

kyuuñ kisī rah-rau se pūchhūñ apnī manzil kā patā
mauj-e-dariyā ḳhud lagā letī hai sāhil kā patā

kahne ko rah-e-shauq meñ raahī to bahut the
manzil ko magar gard-e-safar ham ne kahā hai

aaj tak to mirī kashtī ne na paa.ī manzil
qāfile saiñkaḌoñ gum ho ga.e tūfānoñ ke

kahte haiñ rāh-e-ishq meñ baḌhte hue qadam
ab tujh se duur manzil-e-dushvār ham nahīñ

is tarah manzil-e-ārzū kaT ga.ī is tarah ye ghanī tīrgī chhaT ga.ī
apne paañv pe yaaro ḳharāsheñ to kyā apne chehre pe gard-e-safar bhī na thī

dekhnā hai kaun 'ishqī' saath de sar-e-manzil
ibtidā meñ to sab hī saath saath chalte haiñ

maiñ to kal bhī thā safar meñ maiñ huuñ aaj bhī safar meñ
vahī daur merī manzil vahī merī jag-hañsā.ī

koī manzil nahīñ mirī manzil
kis dorāhe pe aa gayā huuñ maiñ

ḳhushī hai mujh ko tujhe mil ga.ī tirī manzil
ḳhushī se aañkh mirī ashk-bār aaj bhī hai

na zaat meñ koī manzil na kā.enāt meñ hai
safar karūñ to kahāñ koī merā jaada nahīñ

chand chhilkoñ aur ik būḌhī bhikāran ke sivā
rail-gāḌī āḳhirī manzil pe ḳhālī ho ga.ī

har raah to manzil tak le jaatī nahīñ sab ko
kuchh der idhar chalte kuchh der udhar jaate

ye alag baat ki manzil kā nishāñ koī na thā
kohsār aur bhī the koh-e-nidā se pahle

dastaras us kī nigāhoñ kī karāñ tā-ba-karāñ
vo tajassus ke liye āḳhirī manzil kā nishāñ

tum kyā jaano rah rah kaise paate haiñ manzil
tum ko to bas ḳhvāb salonā achchhā lagtā hai

matā-e-azm-e-mohkam hī kā is ko mo.ajiza kahiye
ki manzil ban ga.ī ḳhud rahguzar āhista āhista

maiñ pahuñchā apnī manzil tak magar āhista āhista
kiyā hai puurā ik mushkil safar āhista āhista

aa ke manzil pe so gayā raahī
ḳhatm hai bas yahīñ safar shāyad

gāmzan ho jo shauq-e-manzil hai
raah ke pech-o-ḳham shumār na kar

manzil manzil paañv jamā kar ham bhī chale the ham-safaro
ukhḌī ukhḌī chaal kā baa.is raah kī nā-hamvārī hai