Tags-Manzil

kisī jaade pe chalo chhoḌegī tanhā.ī na saath
qadam uTTheñ to kidhar ishq kī manzil ke ḳhilāf

ye manzil ye hasīñ manzil javānī naam hai jis kā
yahāñ se aur aage baḌhnā ye umr-e-ravāñ merī

ham vo rah-rav haiñ ki chalnā hī hai maslak jin kā
ham to Thukrā deñ agar raah meñ manzil aa.e

yahī rasta hai ab yahī manzil
ab yahīñ dil kisī bahāne lage

jalā ke mish.aleñ chalte to hote manzil par
vo qāfile jo savere ke intizār meñ haiñ

jo ro.e dekh kar har har qadam par paañv ke chhāle
kabhī vo rāh-rau āsūda-e-manzil nahīñ hotā

mere qadmoñ meñ rahī manzil mirī
rāste sūrat mirī dekhā kiye

zarā pahuñch ke to dekho savād-e-manzil tak
tum is ḳhabar pe na jaao ki raushnī kam hai

ham the safar-nasīb so manzil se jā mile
jo sañg-e-mīl the vo zamīñ meñ gaḌe rahe

uupar sab kuchh jal jā.egā kaun madad ko aa.egā
jis manzil par aag lagī hai sab se nīche vaalī hai

qāfile aur bhī manzil kī taraf aate haiñ
tum sar-e-rāh dabāo na abhī ḳhaak meñ aag

ḳhudā mahfūz rakkhe intishār-e-rahnumā.ī se
isī manzil pe aa ke aadmī dīvāna hotā hai

manzil-e-shauq mil chukī un ko
mil ga.e jin ko rahnumā ham se

kyuuñ aise safar par nikle ho manzil nahīñ jis kī koī bhī
kyuuñ raah pe aisī chalte ho saa.e bhī jahāñ dīvār hue

husūl-e-manzil-e-jāñ kā hunar nahīñ aayā
vo raushnī thī ki kuchh bhī nazar nahīñ aayā

koī tūfān hai kachchā ghaḌā hai
nigāh-e-shauq manzil-āshnā hai

raste ke har ik ḳhatre se bachte hue ik din
manzil pe mirā qāfila pahuñchā to luTā hai

'naqsh' ham ahl-e-dil ne dekhe haiñ
manzil-e-ishq ke nasheb-o-farāz

manzil kā patā hai na Thikāna ma.alūm
jab tak na ho gumrāh na aanā ma.alūm

be-zabāñ bhī to batā detā hai manzil kā patā
tai karātā hai safar miil kā patthar ḳhāmosh