Tags-Manzil

gar yahī dīvāngī hai rahravān-e-ishq kī
manzil-e-maqsūd gard-e-kārvāñ ho jā.egī

banānā hai mujhe ḳhud apnī manzil
alag huuñ naqsh-pā-e-kārvāñ se

vo manzil saḳht hai har imtihāñ se
mohabbat ruḳh badaltī hai jahāñ se

qadd-e-bālā o dāman-e-kotāh
manzil-e-ishq ke nasheb o farāz

nahīñ nigāh meñ manzil to justujū hī sahī
nahīñ visāl mayassar to aarzū hī sahī

ḳhush aa gayā hai safar meñ jiinā isī liye to shakīl-'jāzib'
jahāñ se manzil qarīb dekhī vahīñ se vāpas palaT ga.e haiñ

zindagī maut terī manzil hai
dūsrā koī rasta hī nahīñ

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

baḌhī jaatī hai ab to aur bhī kuchh dūrī-e-manzil
achānak nau-ba-nau-dushvārī-har-gām kyā kahiye

kārvāñ shauq kā hai paik-e-nazar se aage
duur se qurbat-e-manzil kā ḳhayāl aayā hai

ham ko har moḌ par dost milte rahe ham kabhī rāh-e-manzil meñ tanhā na the
kal ġham-e-dost thā ab ġham-e-zīst hai āshnā ko to ik āshnā chāhiye

ham ko manzil-shanāsī pe bhī naaz hai aur ham āshnā-e-havādis bhī haiñ
jū-e-ḳhūñ se guzarnā paḌe bhī to kyā justujū ko to ik rāstā chāhiye

rāste bilkul ġhalat phir bhī unheñ manzil milī
ham sahī rastoñ ko hī ījād karte rah ga.e

manzil kī tamannā meñ sar-garm-e-safar haiñ sab
kaun us ke liye ro.e jo raah meñ chhūTā hai

mohabbat ke sivā jaada na manzil
mohabbat ke sivā sab gumrahī hai

rah-guzar kā hai taqāzā ki abhī aur chalo
ek ummīd jo manzil ke nishāñ tak pahuñchī

baḌhe haiñ manzil kī samt ham bhī shuā-e-'baḳht'-e-jamīl le kar
hameñ taraddud nahīñ hai koī agar kahīñ raushnī nahīñ hai

terā rasta judā hī hai sab se
terī manzil kisī ko kyā ma.alūm

maqām-e-faiz milā aur na ham hue mansūr
hamārī manzil-e-maqsūd daar bhī to nahīñ

maiñ faqat chaltī rahī manzil ko sar us ne kiyā
saath mere raushnī ban kar safar us ne kiyā