Tags-Manzil

mujhe samajhne kī manzil hai muntazir un kī
yaqīnī baat hai pāgal kī aas pāgal haiñ

pahuñche na yuuñ hī manzil-e-iz.hār-e-zāt tak
taht-e-shu.ūr ik safar-e-lā-shu.ūr thā

par-e-parvāz niilā āsmāñ manzil sitāroñ kī
kaTe shahpar to yaad aane lagīñ jaulāniyāñ kyā kyā

is liye chal ke har ik gaam pe ruk jaatā huuñ
tā na be-kaif ġham-e-dūri-e-manzil ho jaa.e

kaisī kaisī raah meñ dīvāreñ karte haiñ haa.il log
phir bhī manzil pā lete haiñ ham jaise zinda dil log

apne dard ko gard samajh kar manzil manzil chhoḌ diyā
ā.īne par dhuul jamī hai ā.īne meñ dekhe kaun

ye mai-kada hai kalīsā o ḳhānqāh nahīñ
urūj-e-fikr o faroġh-e-nazar kī manzil hai

jitnā bahtā gayā zindagī kā lahū aur hote ga.e hausle surḳh-rū
sahl hotī ga.ī manzil-e-justujū rāste aur hamvār bante ga.e

ai 'hafīz' in niiñd ke mātoñ kī manzil se nikal
kaam hai darpesh dām-e-dīda-o-dil se nikal

ai jazba-e-dil gar maiñ chāhūñ har chiiz muqābil aa jaa.e
manzil ke liye do gaam chalūñ aur sāmne manzil aa jaa.e

merī manzil pukārtī thī mujhe
lauT kar vo bhī ghar gayā shāyad

āsūda-e-manzil nahīñ āgāh-e-sa.ūbat
mahrūm hai vo lazzat-e-dūrī-e-safar se

iqrār kī manzil bhī zarūr aa.egī ik din
is vaqt to bas lazzat-e-inkār bahut hai

har-nafas ko apnī manzil kā pata miltā nahīñ
jo jahāñ Thahrāv haiñ ik kārvāñ bantā gayā

ḳhud kāTeñge apnī mushkil ḳhud pā.eñge apnī manzil
rāhzanoñ se bhī bad-tar haiñ rāh-numā kahlāne vaale

hadd-e-idrāk se māvarā
manzil-e-ḳhāk tak

manzileñ raah meñ thiiñ naqsh-e-qadam kī sūrat
ham ne muḌ kar bhī na dekhā kisī manzil kī taraf

dard kī kaun sī manzil se guzarte hoñge
ḳhvāb ke paañv zamīnoñ pe utarte hoñge

kyā ishq ke uljhe jaade haiñ manzil kā kahīñ par naam nahīñ
taqdīr hai aur tadbīr nahīñ āġhāz hai aur anjām nahīñ

koī manzil tasavvur hī hai shāyad
safar koī ho pahuñchegā safar tak