Tags-Manzil

ek ik kar ke har manzil kī samt hī bhuul rahā thā maiñ
dhīre dhīre khīñch rahā thā terā rishta ek taraf

aap kī duniyā alag aur alag apnā jahāñ
rāste jab na hoñ manzil pe milā kaise kareñ

tū hai kis manzil meñ terā bol khaañ hai dil kā Thaar
dam tirā aatā hai khaañ suuñ bol khaañ jaatā hai bhaar

thī 'rāhī' kī manzil bhī sab se alag
use ham-safar bhī nirāle mile

thā kisī gum-karda-e-manzil kā naqsh-e-be-sabāt
jis ko mīr-e-kārvāñ kā naqsh-e-pā samjhā thā meñ

liye the baḌh ke qadam jis ke qurb-e-manzil ne
vo kārvāñ na rahā mīr-e-kārvāñ na rahā

muntazir kaun hai kis kā ye use kyā ma.alūm
us kī manzil hai vahī jo bhī jahāñ rah jaa.e

tirī talāsh meñ pairoñ meñ paḌ ga.e chhāle
magar ai manzil-e-maqsūd tū kabhī na milī

maiñ jis aalam meñ huuñ apnī jagah ai 'shor' tanhā huuñ
judā ho jis kī manzil vo rahīn-e-kārvāñ kyuuñ ho

aise chup haiñ ki ye manzil bhī kaḌī ho jaise
terā milnā bhī judā.ī kī ghaḌī ho jaise

jaa.eñ to kidhar jaa.eñ bahke hue manzil se
dhūpeñ bhī ghanerī haiñ saaya bhī ghanerā hai

makān-e-college ke sab makīñ haiñ abhī unheñ tajrabe nahīñ haiñ
ḳhabar nahīñ hai ki aage chal kar hai kaisī manzil haiñ kaisī jaade

āgahī kī manzil se lauT jaa.eñ ham kaise
us jagah nahīñ jaa.ez dekhnā palaT kar bhī

musāfirān-e-rah-e-shauq aur tez qadam
ki chand gaam hī ab manzil-e-judā.ī hai

ham kise karte bhalā rahbar-e-manzil apnā
rāh-e-ulfat meñ na thā koī ba-juz dil apnā

kyuuñ na āsān ho tārīki-e-shab meñ bhī safar
dāġh-e-dil jab hai charāġh-e-rah-e-manzil apnā

hausla rakh tū rahrav-e-manzil
thak ke raste ko apnā ghar na samajh

ġham-e-davām-e-mohabbat hai tishna-e-ma.anī
fanā ke ba.ad agar manzil-e-hayāt nahīñ

chal chal ke thak gayā hai ki manzil nahīñ koī
kyuuñ vaqt ek moḌ pe Thahrā huā sā hai

pā-shikasta ġham-e-vāmāndagī-r-rāh na kar
paas aane ko tire ḳhud koī manzil se uThā