Tags-Manzil

samajh lenā vahīñ umr-e-ravāñ kī āḳhirī manzil
jahāñ par ḳhatm 'afqar' justujū-e-yār ho jaa.e

ab ye dekho ki hamīñ raah hamīñ manzil haiñ
umr-bhar dekh chuke Thokareñ khāte ḳhud ko

haath jab aa.ī nahīñ manzil to jī ghabrā uThā
aur kuchh bhaTke huoñ ke saath honā paḌ gayā

rāh-e-manzil kī jahāñ pahchānñā dushvār thī
zindagī tere qadam aise nishāñ tak aa ga.e

misl-e-kalīm ho agar mārka aazmā koī
ab bhī daraḳht-e-tūr se aatī hai bāñg-e-lā-taḳhaf

manzil-e-shauq kahīñ aur nahīñ
Duub jā.ūñ to kinārā dekhūñ

junūñ ik manzil-e-be-nām ko tai kartā jaatā hai
kise fursat hai jo sūd-o-ziyān-e-zindagī samjhe

sukūn-e-dil kā maqām pūchho vafā kī manzil ke rāhiyoñ se
kaThin hai har din masāfatoñ kā ye ratjagoñ kā azaab kaisā

saañp dekhe haiñ āstīnoñ meñ
kaisī manzil ye aaj sar kī hai

banā ke ik na.ī manzil guzar ga.e hote
jidhar koī nahīñ jaatā udhar ga.e hote

jo ittihād kī manzil pe hote ham 'shārib'
taġhayyurāt ke chehre utar ga.e hote

pareshāñ qāfile ne ab nishāñ manzil kā paayā hai
dhuñdlakoñ ke udhar ik surḳh taarā jhilmilāyā hai

tū lā-makāñ hai to mirī manzil bhī be-nishāñ
tere liye chalā to maiñ chaltā chalā gayā

Dagmagā jaate haiñ pā-e-shauq akasr ai 'ra.īs'
manzileñ aisī bhī aa jaatī haiñ manzil ke qarīb

jaan de kar mutma.in hai rahrav-e-himmat-shikan
dūrī-e-manzil ne pahuñchāyā hai manzil ke qarīb

kashāñ kashāñ liye jaatī hai jānib-e-manzil
nafas kī Dor bhī zanjīr-e-be-sadā kī tarah

rahrav-e-manzil ne ban kar markaz-e-yās-o-umīd
manzileñ lākhoñ banā liiñ apnī manzil ke qarīb

vo nazar bahkī huī phirtī hai kyuuñ dil ke qarīb
us kī manzil bhī hai shāyad merī manzil ke qarīb

nigāhoñ meñ manzil mirī phir rahī hai
yūñhī girtā paḌtā chalā jā rahā huuñ

jaan de dī rahrav-e-manzil ne manzil ke qarīb
hausle tūfāñ ke nikle bhī to sāhil ke qarīb