Tags-Manzil

bahte paanī kī tarah mauj-e-sadā kī sūrat
sū-e-manzil haiñ ravāñ log havā kī sūrat

nazar aatā nahīñ go manzil-e-maqsad kā nishāñ
zauq-e-sādiq yahī kahtā hai ki kuchh duur nahīñ

Dar hai ahl-e-kārvāñ kī tezī-e-raftār se
apnī manzil bhī na kho baiTheñ kisī din josh meñ

junūñ meñ ab mujhe apnī ḳhabar na ġhairoñ kī
ye ġham ne kaun sī manzil pe lā ke chhoḌ diyā

kho ga.ī manzil to ḳhair gard-e-safar meñ
jis pe maiñ chaltā rahā vo raah to hotī

pyaar kī pahlī manzil par anjān musāfir dekh rahā hai
āñkhoñ meñ sañgīn ujāle aur sayyāl añdhere dil meñ

sīna-e-shab ko chiir kar dekho to kyā samāñ hai ab
manzil-e-dil ke sāmne kūcha-e-jāñ ke ās-pās

arbāb-e-junūñ meñ haiñ kuchh ahl-e-ḳhirad shāmil
har ek musāfir se manzil ko na pūchhā kar

surāġh-e-āgahī ko maiñ koī manzil samajh baiThā
sarāb-e-aql kī jānib sadā chaltā rahā huuñ maiñ

ye mashkūk aadmī luuTe haiñ jis ne kārvāñ barsoñ
duā māñgūñ kahīñ ye rahbar-e-manzil na ban jaa.e

in se mat pūchho ki manzil tum se kyuuñ chhīnī ga.ī
in ko mat chheḌo ye mīr-e-kārvāñ ke log haiñ

ye bhī ik manzil-e-junūñ thī 'jalīl'
varna zindān-e-āgahī aur maiñ

hameñ bhī dekh lo āsār-e-manzil dekhne vaalo
kabhī ham ne bhī dekhā thā ġhubār-e-kārvāñ apnā

sar se utre nahīñ phuul manzil kī dhun ham-safar baat sun
raah meñ ḳhaar aa.eñ to talvoñ se chun ham-safar baat sun

charāg manzil-e-dil par jalā ke kyā karte
vafā kā qāfila kab se rukā rukā sā thā

ye ek kāhkashāñ hī nahīñ mirī manzil
ki us ke ba.ad bhī baaqī hai raushnī kā safar

hai jab tak saath banjāra-mizājī
kahāñ manzil kahāñ rasta hamārā

pahuñche haiñ jo apnī manzil par un ko to nahīñ kuchh nāz-e-safar
chalne kā jinheñ maqdūr nahīñ raftār kī bāteñ karte haiñ

ye kyā manzil na aa.egī hamāre rū-ba-rū kab tak
raheñge dasht-e-ġhurbat meñ asīr-e-justajū kab tak

koī manzil āḳhirī manzil nahīñ hotī 'fuzail'
zindagī bhī hai misāl-e-mauj-e-dariyā rāh-rau