Tags-Manzil

qadam na chhoḌte rāhoñ ko tā-ba-manzil-e-shauq
hamārī baat jo ye ahl-e-kārvāñ sunte

naaz bhalā kis baat kā tujh ko pās-e-hunar jab kuchh bhī nahīñ
manzil par pahuñchegā kaise raḳht-e-safar jab kuchh bhī nahīñ

ho sa.i-e-karam ġhairoñ pe agar apnoñ pe mazāq-e-ām na ho
ham raah meñ haiñ Thokar hī to de manzil ke hoñ shāyāñ aur sahī

manzil-e-dil se to guzre hue din biit ga.e
kārvān-e-ġham-e-jānāñ hai rag-e-jāñ ke qarīb

ruk ruk ke chal rahe haiñ ki manzil nahīñ koī
har kūcha varna kūcha-e-dildār bhī nahīñ

mujhe 'ehsān' mere qāfile vāloñ ne ab samjhā
ki ye zarra sitārā ban gayā taqdīr-e-manzil se

sitam kī āḳhirī manzil pe iz.hār-e-pashemānī
nikal aate haiñ aañsū yuuñ to har dukhte hue dil se

abhī tahqīq behtar hai ki phir shikva abas hogā
ki mīr-e-kārvāñ vāqif nahīñ ādāb-e-manzil se

amīr-e-kārvāñ jis raushnī ke bal pe baḌhtā hai
nikaltā hai vo taarā sub.h hote ḳhāk-e-manzil se

manzil kī chāhatoñ meñ qadam raqs meñ rahe
be-kār umr-e-rā.egāñ kā ye safar gayā

manzil se palaT aa.egī ek ek tajallī
haañ sho.ala-e-ruḳhsār-e-sanam saath rahegā

sātvīñ manzil se kuudā chāhiye
ḳhud-kushī karne ko aur kyā chāhiye

azm-e-rāsiḳh hai to har gaam hai manzil ba-kanār
vahshat-āsār sivā darra-e-dushvār sahī

rāhbar jazba-e-sādiq dil-e-ma.asūm kā hai
har nafas ziist kā ik manzil-e-dushvār sahī

dair-o-haram se duur hai shāyad tirā maqām
yaañ varna har qadam pe hai manzil jagah jagah

ziist kī raah ko ab apnī banānā tū misāl
haiñ pashemān jo manzil pe khaḌe haiñ saare

phir kisī ne aaj chheḌā zikr-e-manzil is tarah
dil ke dāman se lipaTne aa ga.ī haiñ dūriyāñ

merī rāhoñ ke liye manzil tū hī
tere qadmoñ ke liye rastā sā maiñ

rastoñ pe añdhere phail ga.e ik manzil-e-ġham tak shaam huī
ai ham-safaro kyā faisla hai ab chalnā hai ki Thaharnā hai

ajiib mushkil hai aah ai dil kaThin hai bīm-o-rajā kī manzil
qadam qadam par ye sochte haiñ kidhar na chaliye kidhar ko chaliye