Tags-Manzil

mujh ko ḳhvāb-o-ḳhayāl hai manzil
qāfila shauq se ravāna ho

shaam ke saa.e meñ vāmāñda sahar baiTh ga.ī
kārvāñ lauT gayā mil na sakī manzil-e-shauq

rāsta chalne ke qābil na rahā ai hamdam
maiñ ne manzil pe nayā marhala ījād kiyā

nākāmi-e-qismat kyā shai hai kyā chiiz shikasta-pā.ī hai
do-gām pe manzil hai lekin do-gām bhī chalnā mushkil hai

'hamīd' shām-e-ġharībāñ kā kis liye shikva
vo dekh jānib-e-manzil charāġh jalne lage

maiñ chal paḌā huuñ to manzil bhī ab milegī 'naved'
ye rāsta mujhe le kar jidhar nikal jaa.e

azm jaatā hai le ke manzil tak
raah to saath saath chaltī hai

gard ko bhī na pahuñch sakte the rahzan jin kī
unhīñ manzil se bhī aage ke safar le Duube

zulmatoñ meñ go Thaharne ko Thahar jaate haiñ log
ahl-e-manzil kī nigāhoñ se utar jaate haiñ log

tujhe rahnumā banā kar mujhe mil ga.ī hai manzil
maiñ bahut bhaTak rahā thā tirī rahbarī se pahle

do ghaḌī ruk kar Thahar kar sochte manzil kī baat
rāste meñ koī aisā moḌ aayā hī nahīñ

sunā thā ham ne ki manzil qarīb aa pahuñchī
kahāñ haiñ aap agar ho sake sadā diije

qarār maut hai manzil-pazīr qadmoñ kī
musāfiroñ ko phir āmāda-e-safar karnā

tū hī manzil mirī tū hī had hai mirī tujh se vābastagī nām-zad hai mirī
tū na ho gar to maiñ ḳhud meñ kho jā.ūñgā maiñ samundar huuñ tū sāhiloñ kī havā

tū mirī ibtidā tū mirī intihā maiñ samundar huuñ tū sāhiloñ kī havā
terī manzil bane merā har rāstā maiñ samundar huuñ tū sāhiloñ kī havā

manzil kā patā jis ne diyā thā mujhe 'bāqī'
us shaḳhs se raste meñ ka.ī baar milā huuñ

duurī meñ kyuuñ ki ho na tamannā huzūr kī
manzil ko merī qurb se nisbat hai duur kī

manzil ke ḳhvāb dekhte haiñ paañv kaaT ke
kyā sāda-dil ye log haiñ ghar ke na ghaaT ke

ai dasht-e-anal-haq tire qurbān abhī tak
vo manzil iz.hār-e-sadāqat nahīñ aa.ī

talāsh-e-yār meñ 'sāqī' hue haiñ sar-gardāñ
kahāñ hai manzil-e-jānāñ hameñ nahīñ ma.alūm