Tags-Manzil

huuñ qatra-zan ba-vādī-e-hasrat shabāna roz
juz tār-e-ashk jāda-e-manzil nahīñ rahā

hamārī hī sa.ī-e-justajū ne surāġh-e-manzil diyā jahāñ ko
talāsh-e-manzil meñ ham ravāna hue the har kārvāñ se pahle

sitam aise kiye tamsīl jin kī mil nahīñ saktī
magar vo is jafā ko avvalīñ manzil samajhte haiñ

rāheñ haiñ do majāz o haqīqat hai jin kā naam
raste nahīñ haiñ ishq kī manzil ke chaar pāñch

ye tamannā hai ki uḌtī huī manzil kā ġhubār
sub.h ke parde meñ yaad aa ga.ī shaam āhista

ham ziist kī sarhad pe mile maut se lekin
hai dasht-e-talab bhī vahī aur manzil-e-jāñ bhī

shahr-e-badan bas rain-baserā jaisā hai
manzil par kab rukte haiñ banjāre log

manzil kī aarzū meñ bhaTakne kā shauq rakh
ik raah kā ġhubār to tū bhī hai maiñ bhī huuñ

chale jo dhuup meñ manzil thī un kī
hameñ to khā gayā saaya shajar kā

kaThin ho jā.egī manzil-shanāsī
kabhī masḳh un kā naqsh-e-pā na karnā

isī fareb meñ rahtā ki paas hai manzil
sitam to ye hai ki rah meñ ġhubār bhī to nahīñ

baḌhātā hai kasal dūrī-e-manzil
ḳhayāl-e-vus.at-e-sahrā na karnā

manzil-e-be-ḳhudī-e-shauq kī azmat ma.alūm
tishna-kāmoñ kī nazar jaam se aage na baḌhī

sū-e-manzil kabhī do gaam se aage na baḌhī
zindagī maut ke ilzām se aage na baḌhī

hausle dūrī-e-manzil se na thak jaa.eñ kahīñ
kitnī pur-ḳhār sī rāhoñ se guzarnā hai abhī

kisī manzil meñ bhī hāsil na huā dil ko qarār
zindagī ḳhvāhish-e-nākām hī karte guzrī

shauq-e-manzil thā kahāñ mujh sā kisī kā mo'tabar
do qadam bhī chal na paa.e ham-safar vāpas hue

ye maanā duur hai manzil
ye maanā ābla-pā huuñ

āḳhirī manzil-e-taskīn-e-dil-o-jān talak
manzileñ raah na kāTeñ ye safar chāhtā thā

muddatoñ tak safar meñ rah kar bhī
koī manzil se duur hai mujh meñ