Tags-Manzil

dasht-e-hastī kā hai darpesh safar muddat se
be-nishāñ manzil-e-maqsūd hai rāheñ qaidī

na jaane kaun sī manzil pe aa pahuñchā hai pyaar apnā
na ham ko e'tibār apnā na un ko e'tibār apnā

vāqif huuñ merī raah kī manzil nahīñ koī
dīvāna-vār phir bhī baḌhe jā rahā huuñ maiñ

sab rāstoñ kā ilm thā manzil qarīb thī
afsos ham-safar kā irāda na kar sake

fazā tabassum-e-sub.h-e-bahār thī lekin
pahuñch ke manzil-e-jānāñ pe aañkh bhar aa.ī

na ho mujhe justujū-e-manzil magar hai manzil mirī talab meñ
koī to mujh ko bulā rahā hai kisī taraf ko to jā rahā huuñ

insāñ haiñ magar biich kī manzil meñ khaḌe haiñ
haivān se pīchhe haiñ jamādāt se aage

hamesha ḳhair se pahuñchā huuñ apnī manzil par
safar se pahle maiñ kuchh de dilā ke chaltā huuñ

ham rahravān-e-shahr-e-tamannā ko kyā pata
manzil rah-e-talab se kahāñ tak judā bhī hai

himmat na haar de koī manzil ke sāmne
parvardigār yuuñ bhī koī nā-tavāñ na ho

maiñ jab māyūs ho kar rāste meñ baiTh jaatā huuñ
to har manzil mirī āvārgī se baat kartī hai

vahāñ se manzil-e-irfān-e-zāt duur na thī
vo jis maqām pe us kī talāsh chhoḌ gayā

tai marhala kiyā hai adam se vajūd kā
pahuñchā huuñ tab maiñ manzil-e-nā-hast-o-hast par

safar hai dushvār ḳhvāb kab tak bahut paḌī manzil-e-adam hai
'nasīm' jaago kamar ko bāñdho uThāo bistar ki raat kam hai

ye bhī mumkin hai ki jholī meñ amal kī ik roz
yaas kī ḳhaak ho aur duur ho apnī manzil

koī manzil na milī paañv jo ghar se niklā
phir safar pesh thā jab gard-e-safar se niklā

na ain par hī rukī shiin pe na qaaf pe hī
tumhārī yaad kī manzil na intihā koī

thā kisī gum-karda-e-manzil kā naqsh-e-be-sabāt
jis ko mīr-e-kārvāñ kā naqsh-e-pā samjhā thā meñ

ye aañsū DhūñDtā hai terā dāman
musāfir apnī manzil jāntā hai

paa.ī manzil to sab ne ye pūchhā
aap is rāste pe kab aa.e