Tags-Manzil

pā-e-talab kī manzil ab tak vahī galī hai
āġhāz bhī yahī thā anjām bhī yahī hai

maiñ huuñ 'bāqar' aise maqām par nahīñ kam-nazar kā jahāñ guzar
ye ajiib manzil-e-shauq hai ki na hijr hai na visāl hai

nishāñ us kā kahīñ miltā surāġh us kā kahīñ lagtā
to apnā paañv kyuuñ thak kar rah-e-manzil meñ rah jaatā

koī armāñ talāsh-e-dost kā kyuuñ dil meñ rah jaatā
ġhubār apnā agar gard-e-rah-e-manzil meñ rah jaatā

rāste jitne haiñ sab jaate haiñ manzil kī taraf
shart-e-manzil hai magar jhūmte gaate chaliye

azm hai dil meñ to manzil bhī koī duur nahīñ
sāmne aa.e jo dīvār girāte chaliye

pahuñche haiñ jo apnī manzil par un ko to nahīñ kuchh nāz-e-safar
chalne kā jinheñ maqdūr nahīñ raftār kī bāteñ karte haiñ

diloñ kī raah par āḳhir ġhubār sā kyuuñ hai
thakā thakā mirī manzil kā rāstā kyuuñ hai

saare charāġh chhoḌ ke manzil pe baḌh chalā
rasta dikhā rahī hai abhī tīrgī mujhe

manzil-e-ishq nahīñ aql ke bas kī ai dost
hai agar sāhib-e-dil qāfila-sālār badal

kaun vafā kī manzil se is shaan se guzrā
chāk-e-qabā dekhe jo koī balā se dekhe

ḳhuuñ meñ luThḌe hue lāshe haiñ nuqūsh-e-kaf-e-pā
aur kar manzil-e-jānāñ kā irāda ai dil

justujū aur na.ī bahr-e-husūl-e-manzil
apnī raftār sū-e-ḳhār-e-muġhīlāñ kar leñ

manzil-e-maqsūd meñ chal kar nikālūñgā unheñ
ābloñ meñ ye jo haiñ paivast kāñTe raah ke

apnī manzil to sarāboñ kā safar hai 'bāqī'
ham kisī raah pe ho leñge hamārā kyā hai

manzil-e-dil bhī vahī kū-e-malāmat bhī vahī
ishq kā jazba-e-be-tāb kahāñ laayā hai

ai 'qalaq' chaliye ki manzil duur hai
ho raheñge yaar sab bāham vidā.a

manzil-e-zīst ke kisī bhī taraf
apnī jānib nishān khīñchtā hai

zulmat-zadoñ ko jāda-o-manzil kī kyā ḳhabar
tārīk rāstoñ meñ bhalā kyā sujhā.ī de

aur qutboñ se qutboñ tak uḌ uḌ kar jaane vaale thake paroñ kī kamāneñ bhī to
ik manzil pe chamaktī ābnāo kī samt lachak jaatī haiñ