Tags-Manzil

har qadam dūri-e-manzil hai numāyāñ mujh se
merī raftār se bhāge hai bayābāñ mujh se

rāh-e-ulfat meñ hai marnā zindagī
dard manzil tak mujhe pahuñchā gayā

'nāz' us ke ho nahīñ sakte marāhil sadd-e-rāh
jis ko manzil tak pahuñchnā hai vo chaltā jā.egā

tā-had-e-manzil tavāzun chāhiye raftār meñ
jo musāfir tez-tar aage baḌhā rah jā.egā

talāsh-e-manzil kā azm-e-mohkam dalīl-e-manzil-rasī hai 'zāhid'
qadam to apne baḌhāo aage khulī huī raah bhī milegī

ek bhaTke hue raahī ko sahārā de kar
jhūTī manzil kā nishāñ tum ne dikhāyā kyuuñ thā

le aayā kaun gor-e-ġharībāñ meñ khīñch kar
kosoñ abhī maiñ manzil-e-maqsad se duur thā

dil sail-e-havas meñ to pahuñchtā hai kahīñ aur
mad.hosh musāfir ho to manzil kā pata kyā

paañv zaḳhmī hue aur duur hai manzil 'vāsif'
ḳhūn-e-aslāf kī azmat ko jagā luuñ to chalūñ

ik rahguzār manzil-e-mastī hai mai-kada
har riñd ko ḳhushī se sharīk-e-safar karo

jiine kī raah chhoḌ ke aage nikal gayā
manzil pukārtī rahī jaatā hai sar-phirā

vahī kārvāñ vahī qāfila tumheñ yaad ho ki na yaad ho
vahī manzil aur vahī marhala tumheñ yaad ho ki na yaad ho

añdherī raat thakī himmateñ kaḌī manzil
salāmtī kī duā maañg kārvāñ ke liye

baTe rahoge to apnā yūñhī bahegā lahū
hue na ek to manzil na ban sakegā lahū

maiñ to jaise khaḌā huā huuñ ik manzil par
aur lamhe ye vaqt ke TukḌe

manzil-e-tūl-e-amal darpesh aur mohlat hai kam
raah kis se pūchhiye hairat meñ naqsh-e-pā haiñ aap

rah-e-hayāt meñ manzil kā aasrā kaisā
qadam qadam pe ġhubāroñ ne saath chhoḌ diyā

chhoḌ ke kārvān-e-shauq manzil-e-ġham pe kar qayām
misl-e-ġhubār-e-kārvāñ phirtā hai dar-ba-dar kahāñ

valvala-hā-e-shauq sab sarf-e-muhājrat hue
ab sar-e-manzil vafā DhūñD rahe ho ghar kahāñ

sub.h-e-vafā se hijr kā lamha judā karo
manzil se gard, gard se rasta judā karo