Tags-Manzil

justujū shart hai manzil nahīñ mashrūt-e-talab
gum ho is tarah ki gard-e-rah-e-manzil ho jaa.e

jahāñ meñ har bashar majbūr ho aisā nahīñ hotā
har ik raahī se manzil duur ho aisā nahīñ hotā

shor bharī duniyā kī dukhī tanhā.ī meñ
umr kī jis manzil pe jis jīvan kī Dagar par

hujūm-e-shauq aur rāh-e-mohabbat kī balā-ḳhezī
kahīñ pahlā qadam hī āḳhirī manzil na ban jaa.e

madad ai jazb-e-dil rāh-e-mohabbat saḳht mushkil hai
ḳhayāl-e-dūri-e-manzil kahīñ manzil na ban jaa.e

jī lagā kar ye ġhazal kis tarah kahiye ai 'munīr'
bujh gayā dil kūch-e-manzil kī azīmat dekh kar

uḌ gayā hai manzil-e-dushvār meñ ġham kā samand
gesū-e-pur-pech-o-ḳham ke tāziyāne kī kaho

musāfir chalte chalte thak ga.e manzil nahīñ miltī
qadam ke saath baḌhtā jā rahā ho fāsla jaise

agar tum āsmāñ par jā rahe ho shauq se jaao
mire naqsh-e-qadam aage kī manzil kā patā deñge

vaañ qāfila manzil pe bhī pahuñchā magar ab tak
ham karte haiñ sahrā meñ bā-āvāz-e-darā raqs

koī manzil to mile ābla-pā.ī ke tufail
koī sūrat to bane chehra sañvarne ke liye

hai ḳhalvat-e-dil-e-vīrāñ hī manzil-e-mahbūb
ye ḳhalvat-e-dil-e-vīrāñ nahīñ to kuchh bhī nahīñ

hazār dil hai tirā mashriq-e-mah-o-ḳhurshīd
ġhubār-e-manzil-e-jānāñ nahīñ to kuchh bhī nahīñ

dil kī manzil us taraf hai ghar kā rasta is taraf
ek chehra us taraf hai ek chehra is taraf

rukūñ to hujla-e-manzil pukārtā hai mujhe
qadam uThā.ūñ to rasta nazar nahīñ aatā

hai abhī duur bahut duur hamārī manzil
hukm hai farsh se tā-arsh-e-muallā ham ko

ai jazb-e-shauq-e-manzil mamnūn-e-ġhair kyuuñ hoñ
ḳhud rāsta badal kar bichhḌā huuñ kārvāñ se

koī maqsad na koī mustaqbil koī sāthī na hai koī manzil
tum ko jaanā hai jahāñ tum jaao kyā batā.ūñ maiñ kidhar jā.ūñgā

ba-juz manzil kahīñ rāhat nahīñ miltī musāfir ko
ilāj-e-ābla-pā.ī bayābāñ se nahīñ hotā

manzil pe 'shamīm' ko na paayā
shāyad aage nikal gayā hai