Tags-Manzil

ḳhabar jahāñ miltī hai apne hone kī
ham us manzil par bhī kho.e kho.e haiñ

jis kā anjām huā us kī shurūāt na thī
raah par aa na sakā jo sar-e-manzil aayā

ik raah pe mujh ko chhoḌ diyā manzil kā pata kuchh bhī na diyā
is baab kī maiñ tamhīd banā jis baab kā unvāñ kuchh bhī nahīñ

ek Thikānā aage aage pīchhe ek musāfir hai
chalte chalte saañs jo TuuTe manzil kā elaan kareñ

ek rahzan ko amīr-e-kārvāñ samjhā thā maiñ
apnī bad-baḳhtī ko manzil kā nishāñ samjhā thā maiñ

hazār kos nigāhoñ se dil kī manzil tak
koī fareb se dekhe to ham ko pahchāne

safar kā shauq na manzil kī justujū baaqī
musāfiroñ ke badan meñ nahīñ lahū baaqī

pūchhte manzil-e-salmā kī ḳhabar ham jis se
vādī-e-najd meñ aisā koī insāñ na milā

gir paḌtā huuñ aksar maiñ rah-e-ishq meñ jis jā
ik marhala hotā hai vo manzil nahīñ hotī

dilkash haiñ kuchh aise rah-e-ulfat ke manāzir
rahrav ko kabhī ḳhvāhish-e-manzil nahīñ hotī

taufīq agar rahbar-e-manzil nahīñ hotī
me.arāj-e-mohabbat kabhī hāsil nahīñ hotī

manzil milī murād milī mudda.ā milā
sab kuchh mujhe milā jo tirā naqsh-e-pā milā

be-chale hī paañv dete haiñ javāb
manzil-e-ulfat meñ sar kā kaam hai

dhuul se raah aTī ho ga.ī manzil ma.adūm
kyā ḳhabar kyā hai mire azm-e-safar kā maqsūm

agar sukūñ hai to hai bandagī ke dāman meñ
milegī manzil-e-irfāñ usī ke dāman meñ

na pahuñchoge manzil ko tum 'mus.hafī'
gayā duur ab kārvāñ baiThiye

mujh ko miltī na ai 'vafā' manzil
aql qismat se rāhbar na huī

vaqt kā qāfila aatā hai guzar jaatā hai
aadmī apnī hī manzil meñ Thahar jaatā hai

yūñhī khaḌe raheñ kisī manzil kī aas meñ
gard-e-malāl-e-hijr se raste aTe raheñ

manzil-e-ḳhurshīd se aage chalo
mausam-e-parvāz-o-par hai dosto