Tags-Manzil

mere qadmoñ ke nishāñ chāñd pe raḳhshanda haiñ
aap aa jā.iye āvāra-e-manzil kī tarah

chāñd vīrān hai sadiyoñ se mire dil kī tarah
zindagī ġham hai ḳhalā meñ mirī manzil kī tarah

band-e-qabā-e-surḳh kī manzil un par sahl huī hai
jin hāthoñ ko aag churā lene ke hunar aate haiñ

ye bhī ik shān-e-rahīmī hai tirī izz-o-jal
na to manzil kī ḳhabar hai na masāfat ma.alūm

jaane is rah-rav kī nazreñ kaun sī manzil pe hoñ
ek kāñTā sā khaTakte haiñ dil-e-rahbar meñ ham

soz-e-ġham se jab bahut jaltā hai dil apnā 'jigar'
ruuh kī manzil meñ kuchh kuchh raushnī aatī to hai

mohabbat kī haqīqat khul ga.ī chāk-e-girebāñ se
junūñ bhī ek manzil meñ zamāna-sāz hotā hai

apnā apnā husn-e-nazar hai apnī apnī manzil hai
shart mayassar aatā hai to sāya-e-zulf-e-yār bahut

maqām-e-hosh se guzrā makāñ se lā-makāñ pahuñchā
tumhāre ishq meñ dīvāna-e-manzil kahāñ pahuñchā

'sabīla' kyā kahūñ manzil kahāñ hai
ḳhudā vāqif hai jo dar sochtī huuñ

saḳhtī-e-rāh khīñchiye manzil ke shauq meñ
ārām kī talāsh meñ iizā uThā.iye

har ik zarra hai dil ai jaane vaale dekh kar chalnā
hazāroñ hastiyāñ lipTī paḌī haiñ ḳhāk-e-manzil se

janāb-e-ḳhizr ham ko ḳhaak raste par lagā.eñge
ki manzil be-ḳhudoñ kī hai muarra qaid-e-manzil se

sūrat-e-gard-e-kārvāñ hai ġham-e-manzil-e-jahāñ
ḳhvāb-e-junūn-e-tāza-kār chāhiye raah ke liye

kal sāmne manzil thī pīchhe mirī āvāzeñ
chaltā to bichhaḌ jaatā ruktā to safar jaatā

rishte se muhāfiz kā ḳhatra jo nikal jaatā
manzil pe bhī aa jaate naqsha bhī badal jaatā

justujū aa ga.ī sar-e-manzil
rah gayā raah meñ ġhubār apnā

har haal meñ manzil pe nazar hotī hai jinkī
rāhoñ meñ kabhī rāh-numā se nahīñ Darte

umr bhar chal ke bhī paa.ī nahīñ manzil ham ne
kuchh samajh meñ nahīñ aatā ye safar kaisā hai

garm-e-safar hai garm-e-safar rah muḌ muḌ kar mat pīchhe dekh
ek do manzil saath chalegī paTke hue qadmoñ kī chaap