Tags-Manzil

ta.ayyun husn-e-maqsad kā nahīñ is ke sivā koī
Thahar jaa.eñ jahāñ ham bas use manzil samajhte haiñ

ye tamannā hai ki koī rāhzan
kārvān-e-manzil-e-dil luuT le

ishq meñ har qadam hai ik manzil
rāh-e-ulfat kī mushkilāt na pūchh

dekh kar merī talab merā junūn-e-manzil
rāste kaise pareshān nazar aane lage

bas apnī bebasī kī sātvīñ manzil meñ zinda huuñ
yahāñ par aag bhī rahtī hai aur nauha bhī rahtā hai

na pahuñchegā maqsad ko kam-himmatī se
jo sālik talabgār-e-manzil rahegā

paas thī manzil-e-murād magar
ham ġham-e-raftagāñ ke saath rahe

ḳharāb-o-ḳhasta-o-āsūdagān-e-manzil bhī
naved-e-jashn ki 'haqqī' kā kārvāñ na rahā

ye irtiqā-e-bashar kī hai kaun sī manzil
ki is kī zad meñ ḳhudā bhī hai kā.enāt bhī hai

chalā to hai magar ai rahrav-e-rah-e-irfāñ
haqīqatoñ kī bhī manzil kahīñ majāz na ho

turbat se lagā kartā mahshar sunte haiñ koī miltā hī nahīñ
manzil hai baḌī ābādī kī rasta hai baḌā vīrāne kā

'bedam' kaheñ kyā kis tarah rahe mar mar ke jiye jī jī ke mare
dar-manzil-e-ishqash dar-badare majnūn-e-shorīda-sare

dil ko ma.amūr karo jazb-o-asar se pahle
naqsh-e-manzil chamak uTTheñge safar se pahle

tapte sahrā to mirī manzil-e-maqsūd na the
maiñ kahīñ ham-safar-e-abr-e-ravāñ kyuuñ na huā

manzil baġhair tai kiye letā nahīñ huuñ chain
ye dam ye hausla hī kahāñ rāhbar meñ hai

log jise kahte haiñ manzil
vo bhī qaid-e-besh-o-kam hai

jise ab samajhte ho baar dīda-o-jān pe
kabhī rāh-e-manzil-e-yār thā so nahīñ rahā

tirī manzil-e-vafā meñ huā ḳhud se āshnā maiñ
tirī yaad kā karam hai ki yahī hai dost dushman

manzil na milī kashmakash-e-ahl-e-nazar meñ
is bhiiḌ se maiñ apnī nazar le ke chalā huuñ

vo rahī 'saif' manzil-e-hastī
do qadam aa sako to aa jaao