Tags-Manzil

yahī manzil kā nishāñ bhī degā
ḳhuun rastoñ pe na bahne diije

manzil kī dhun meñ ābla-pā chal khaḌe hue
aur shahsavār gard-e-safar dekhte rahe

qadam chālīsvīñ manzil meñ us yūsuf ne jab rakkhā
to pahuñchā kārvān-e-vah.i āvāz-e-jaras ho kar

dard Thahregā vafā kī manzil
aks shīshe se judā kyā karnā

koī har-gām 'musavvir' ye sadā detā hai
maiñ tirī āḳhirī manzil huuñ Thahar jā mujh meñ

aaj manzil pe pahuñch kar mujhe ehsās huā
raah meñ chhūT ga.e dost purāne kitne

koī bhī dūrī-e-manzil nahīñ agar 'darshan'
jahāñ ko merā junūn-e-ḳhirad-shikār mile

āñkheñ muuñd ke chalne vaale dhun ke pakke nikle to
chalte chalte ik din āḳhir manzil ko pā jā.eñge

ye shukr hai ki duur nahīñ manzil-e-murād
chhup-chhup ke jā pahuñchte haiñ har pāsbāñ se ham

ai gardish-e-talāsh na manzil na rāsta
merā junūñ hai kyā mirī āvārgī hai kyā

har nafas shauq bhī hai manzil kā
har qadam yād-e-raftagāñ bhī hai

ye safar hai manzil-e-shauq kā koī ham-safar koī ham-rahī
kisī dil-shikasta ko saath le koī sargirāñ ho to le ke aa

jab thī manzil nazar meñ to rasta thā ek
gum huī hai jo manzil to raste bahut

be-niyāz-e-fikr-e-manzil be-ḳhudī ne kar diyā
ab mire dāman pe dāġh-e-hasrat-e-manzil nahīñ

gard-e-manzil aaj tak hai be-qarār
ik qayāmat hī uThā kar chal diye

rāh-e-gum-karda-e-manzil haiñ ki manzil kā surāġh
kuchh sitāre jo sar-e-qarya-e-shab jāgte haiñ

jāñ-ba-haq ho gayā taslīm alag baat hai ye
rah-rav-e-ishq yuuñ āsūda-e-manzil na huā

roz-e-avval se haiñ sargarm-e-talāsh-e-mahbūb
ham sā koī magar āvāra-e-manzil na huā

qindīl-e-sahar nūr-e-manzil ḳhurshīd-e-sahar sham-e-sāhil
ye ḳhūn-e-shahīdāñ kā maḳhzan ye dard-e-rafīqāñ kā hāsil

qadmoñ se lipaTtī hai sarāboñ kī gard
rasta kisī manzil kā taqāzā kyā hai