Tags-Manzil

nahīñ tirī raah rāh-e-mushkil hai rahbar-e-rāh ḳhud tirā dil
tire qadam meñ hai terī manzil tavīl be-shak safar hai pyāre

qāfile bhaTke hue manzil-e-maqsūd se the
band thī raah mire naqsh-e-qadam se pahle

maiñ jab sukūn kī manzil se chand gaam pe huuñ
sadā.eñ detā hai maazī mirā musalsal kyuuñ

na rahnumā hai na manzil dayār-e-ulfat meñ
qadam uThāte hī ḳhizr-e-shikasta-pā to milā

hai aaj aur hī kuchh zulf-e-tābdār meñ ḳham
bhaTakne vaale ko manzil kā rāsta to milā

tū jis meñ thā vo manzil-e-hastī meñ hai zarūr
merī fanā se dil mirā kyuuñ kar fanā huā

is se baḌh kar koī be-rāh-ravī kyā hogī
gām-e-pur-shauq kā manzil se shanāsā honā

manzil hai kaThin kam zād-e-safar ma.alūm nahīñ kyā honā hai
aur lañgDā apāhij hai rahbar ma.alūm nahīñ kyā honā hai

sarāsar tāḳhtan ko shash-jihat yak-arsa jaulāñ thā
huā vāmāñdgī se rah-ravāñ kī farq manzil kā

sahrā-navardiyoñ meñ guzārī hai zindagī
ab mujh ko ḳhauf-e-dūri-e-manzil nahīñ rahā

begāna-sifat jāda-e-manzil se guzar jā
har chiiz sazā-vār-e-nazāra nahīñ hotī

chalnā paḌtā hai har ik raah meñ ik umr 'tarāz'
itnā āsāñ nahīñ manzil kā nishāñ ho jaanā

maiñ hī apnā mohtasib ban jā.ūñ varna dosto
gumrah-e-manzil huuñ yā huuñ raah par dekhegā kaun

jo sīna-e-raushan hai vo hai manzil-e-ulfat
jo dil sifat-e-sham.a hai parvāna hai us kā

rahrav-e-rāh-e-mohabbat rah na jaanā raah meñ
lazzat-e-sahrā-navardī dūrī-e-manzil meñ hai

pairvī se mumkin hai kab rasā.ī manzil tak
naqsh-e-pā miTāne ko gard-e-rāh kaafī hai

Thokar kisī patthar se agar khaa.ī hai maiñ ne
manzil kā nishāñ bhī usī patthar se milā hai

zehn-e-āvāra ne ehsās ko rāheñ de kar
manzil-e-dār-o-rasan tak mujhe pahuñchāyā hai

be-ḳhatar kaun chalā jānib-e-manzil 'manzar'
kis kā lahja hai jo māhaul se Takrāyā hai

phir dījiye nigāh ko paiġhām-e-justujū
manzil se kyuuñ nazar ko gurezāñ banā.iye