Tags-Manzil

jab numāyāñ vo savār-e-rah-e-manzil hogā
na to maiñ aap meñ hūñgā na mirā dil hogā

phirte haiñ tire shahar meñ be-yār-o-madadgār
gard-e-rah-e-manzil kī tarah ḳhāk-ba-sar ham

mohabbat meñ nahīñ mumkin pahuñchnā hadd-e-manzil tak
musāfir terī rāhoñ meñ bhaTak jaa.eñ to achchhā hai

kārvānoñ ke rahbar ne rāhzan phir bhī manzil pe kuchh rāh-rau aa ga.e
vo na.e kārvānoñ ke rahbar bane jin se hai azmat-e-rahbarāñ aaj tak

musāfir-e-abadī kī nahīñ koī manzil
yahāñ qayām kiyā yā vahāñ qayām kiyā

ālam-e-be-ḳhudī meñ gar sajda kiyā koī 'vaqār'
ban gayā naqsh-e-jāvedāñ manzil-e-be-sabāt meñ

pahuñchā na thā yaqīn kī manzil pe maiñ abhī
merā ḳhayāl mujh se bhī aage nikal gayā

ravāñ-davāñ na.ī tahzīb kā safar rakkho
magar nigāh ko manzil se bā-ḳhabar rakkho

manzil kahāñ hai duur talak rāste haiñ yaar
kis justujū meñ ḳhvāb ke ye qāfile haiñ yaar

vo mire pūchhne ko aa.e haiñ sach-much 'aḳhtar'
yā koī ḳhvāb-e-hasīñ manzil-e-ta.abīr meñ hai

koī rahbar hai na rasta hai na manzil 'tausīf'
ham ki gard-e-rah-e-sar-sar haiñ hamārā kyā hai

luT ke manzil se koī yuuñ to na aayā hogā
jis tarah chhoḌ ke ham shahr-e-adam nikle haiñ

vo āshnā-e-manzil-e-irfāñ huā nahīñ
jis ko tire karam kā sahārā milā nahīñ

zād-e-safar kī fikr na manzil kā ho ḳhayāl
rāh-e-talab meñ aao talabgār kī tarah

umr-e-pāyāñ kī manzil meñ ahd-e-māzī aa.e yaad
ab bhī 'nazar' meñ raqsāñ mere bhūle bachpan ke lamhāt

eḌiyāñ vādi-e-ġhurbat meñ ragaḌte hī rahe
duur khiñchtī ga.ī manzil vatan-āvāroñ se

koī manzil nahīñ baaqī hai musāfir ke liye
ab kahīñ aur nahīñ jā.egā ghar jā.egā

ḳhud use bhī nahīñ ma.alūm hai manzil apnī
jaane vaale se na pūchho vo kidhar jā.egā

zamīn hī mirā rasta zamīn hī manzil
zamīn chhoḌ ke jaatā to maiñ kidhar jaatā

bas ek manzil hai bul-havas kī hazār raste haiñ ahl-e-dil ke
yahī to hai farq mujh meñ us meñ guzar gayā maiñ Thahar gayā vo