Tags-Manzil

baḌhe chalo ki thakan to nashe kī mahfil hai
abhī to duur bahut duur apnī manzil hai

ḳhirad kī rahbarī ne to hameñ ye din dikhā.e haiñ
junūñ ho jā.egā jab rahbar-e-manzil to kyā hogā

shabāb-e-husn hai barq-o-sharar kī manzil hai
ye āzmā.ish-e-qalb-o-nazar kī manzil hai

har-qadam par shauq-e-manzil kī farāvānī to hai
rāh-e-dushvār-e-mohabbat meñ ye āsānī to hai

garebāñ chaak hai hāthoñ meñ zālim terā dāmāñ hai
ki is dāman talak hī manzil-e-chāk-e-garebāñ hai

ai jazba-e-dil gar maiñ chāhūñ har chiiz muqābil aa jaa.e
manzil ke liye do gaam chalūñ aur sāmne manzil aa jaa.e

ai rahbar-e-kāmil chalne ko tayyār to huuñ par yaad rahe
us vaqt mujhe bhaTkā denā jab sāmne manzil aa jaa.e

kyā ham se musāfir ko qarār aa bhī sakegā
manzil koī manzil kā pata aur hī kuchh hai

manzil mire nasīb meñ likh dī ga.ī magar
pur-pech rāsta mujhe dikhlā diyā gayā

ġham-e-firāq kī manzil 'ra.īs' ḳhatm huī
ab aage jalve hī jalve haiñ hijr-e-yār ke ba.ad

kis manzil-e-murād kī jānib ravāñ haiñ ham
ai rah-ravān-e-ḳhāk-basar pūchhte chalo

jo ḳhud ko kah rahe haiñ ki manzil-shanās haiñ
un ko bhī kyā ḳhabar hai magar pūchhte chalo

musāfiroñ ko barābar nahīñ zamān-o-makāñ
havā kā ek qadam aur habāb kī manzil

mizāj-e-dard ko āsūdgī se raas karo
kahāñ milegī tumheñ iztirāb kī manzil

kuchh aisā rañj diyā bachpane kī ulfat ne
phir us ke ba.ad na aa.ī shabāb kī manzil

milī jo aas to sab marhale hue āsāñ
nahīñ hai koī bhī manzil sarāb kī manzil

nahīñ hai aap hī maqsūd apnā jauhar-e-zāt
ki āftāb nahīñ āftāb kī manzil

masām naach rahe haiñ muāmlat ke liye
guzar ga.ī hai savāl-o-javāb kī manzil

har ek raah se aage hai ḳhvāb kī manzil
tire huzūr se baḌh kar ġhayāb kī manzil

milegī bāda-gusāroñ ko shaiḳh kyā jaane
gunah kī raah se ho kar savāb kī manzil