Tags-Mashwara

is mashvara ke saath ki charchā na chāhiye
dil kah rahā hai un pe bharosa na chāhiye

raḳhsh-e-abad-ḳhirām kī thamtī nahīñ haiñ bijliyāñ
sub.h-e-azal-nizhād se karnā hai mashvara mujhe

shohrat ke ḳhvāstgāro mirā mashvara hai ye
'ġhālib' kā apne aap ko saanī likhā karo

havā se dostī jis ko thā mashvara merā
usī charāġh kī lau se maiñ aaj Dar bhī gayā

gerua kapḌoñ meñ lipTā zard mustaqbil mujhe
mashvara detā rahegā aur maiñ mar jā.ūñgā

ḳhat koī pyaar bharā likh denā
mashvara likhnā duā likh denā

mashvara kar ke ye dil kūcha-e-jānāñ ko chalā
azm to laane kā kiijo maiñ machal jā.ūñgā

aql kī bartarī dil ne maanī to kyā us ne chāhā kabhī aql kā mashvara
dil ko jis tarah chalnā thā chaltā rahā aql har gaam par haath maltī rahī

dil-āzārī kā ham-sūrat se apne mashvara leñge
ilāhī ḳhair ā.īna talab hotā hai ḳhalvat meñ

mujh se ye bojh nahīñ uTh saktā
mashvara koī mujhe mat diije

kis ne diyā thā sulh-o-safā.ī kā mashvara
bastī meñ ho ke jañg kā elaan rah gayā

tumheñ ai 'ḳhālid'-e-irfān merā mashvara hai
ġhazal kahnā magar har jā ġhazal-ḳhvānī se bachnā

yaaro se karo mashvara aġhyār se pūchho
kab tak vo raheñge khiche talvār se pūchho

ham baḌe ahl-e-ḳhirad bante the ye kyā ho gayā
aql kā har mashvara dīvāna-pan lagne lagā

tum achchhī dost ho so merā mashvara ye hai
milā-julā na karo 'fāris'-e-ḳharāb ke saath

ye mashvara hai mirā 'ramz' e'tirāz nahīñ
parā.ī aag bujhāne meñ ḳhud jalā na kare

samjho unheñ jo dete haiñ ye mashvara tumheñ
nargis se haath joḌ ke bīnā.ī maañg lo

ham ko pasand aa gayā sāhil kā mashvara
kashtī kī lakḌiyāñ the shajar ho ke rah ga.e

baat kar farhād se bhī intihā-e-ishq par
mashvara mujh se bhī kar kuchh tajraba merā bhī hai

mashvara bhī kar leñge ham
pahle to ghar aa jaanā