Tags-Mausam

zavāl-e-mausam-e-ḳhush-rañg kā gila 'āsim'
zamīn se to nahīñ āsmāñ se hotā hai

uruuj par hai chaman meñ bahār kā mausam
safar shurū ḳhizāñ kā yahāñ se hotā hai

ho rahā hai zikr paiham aam kā
aa rahā hai phir se mausam aam kā

zahr se kam nahīñ ye sāġhar-e-mai mere liye
tū nahīñ hai to ye mausam ye fazā kuchh bhī nahīñ

tumhāre shahr kā mausam baḌā suhānā lage
maiñ ek shaam churā luuñ agar burā na lage

kyā bharosā badalte mausam kā
rañg kal kuchh thā aaj aur hai kuchh

muzhda ai yaas ki yaañ kunj-e-qafas ke qaidī
yak-ba-yak mausam-e-parvāz meñ mar jaate haiñ

jab bhī mausam-e-hunar harf o bayāñ le jaa.e
yuuñ lage jism se jaise koī jaañ le jaa.e

jā jā ke palaT aate haiñ kis ke liye mausam
ye shaam shafaq raat sahar kis ke liye hai

jal gayā saarā badan in mausamoñ kī aag meñ
ek mausam ruuh hai jis meñ ki ab zinda huuñ maiñ

aise mausam guzar ga.e haiñ ki ab
mujh ko bhī mujh sā tum na pāoge

be-mausam bārish kī sūrat der talak aur duur talak
tere dayār-e-husn pe maiñ bhī kin-min kin-min barsūñgā

jabhī laa.ī hai sabā mausam-e-gul kī aahaT
barg afsurda hue shāḳhoñ ko Darte dekhā

ik isī soch meñ gum ho ga.e kitne mausam
in se ham haal zabānī hī kaheñ yā likkheñ

mausam-e-gul ye tirī zard sahāfat kaisī
phuul ma.asūm haiñ phūloñ se siyāsat kaisī

bārish rukī vabāoñ kā bādal bhī chhaT gayā
aisī chaleñ havā.eñ ki mausam palaT gayā

hijr kī rut jāñ-levā thī par ġhalat sabhī andāze nikle
taaza rifāqat ke mausam tak maiñ bhī jiyā huuñ vo bhī jiyā hai

fazā meñ jab bhī bikharte haiñ rañg mausam ke
tumhāre aks se lagte haiñ rañg mausam ke

kiyā hai ham ne bhī mahsūs 'jyotī' har lamha
tumhāre dil meñ machalte haiñ rañg mausam ke

har ek chehre pe ḳhushiyāñ bikher dete haiñ
zamīñ pe jab bhī utarte haiñ rañg mausam ke